Tempotimor (Covalima)-Kinta-feira (28/10/2021), Bispu Dioseze Maliana, Dom Norberto do Amaral fó ordenasaun saserdotál ba diákonu João Guterres no Francisco Inadra do Nascimento Tey Seran.
Tuir Dom Norberto, ordenasaun ne’e hanesan grasa Maromak nian, Nune’e agradese ba Maromak tanba serimonia ida ne’e ho di’ak.
“Ita agradese ba Maromak no ba familia sira, tanba hasai sira-nia oan ho laran luak ita reza nafatin agradese ba familia sira servisu ho susesu no ordenasaun tuir dalan ne’ebé ita hotu hakarak,” dehan Bispo Dioseze Maliana, Dom Noverto do Amaral ba jornalista sira, Kinta (28/10).
Iha fatin hanesan Padre Francisco Indra do Nascimento Tey Seran prontu sai kristu nia saseluk ka instrumentu hodi sai mediadór ema ho Maromak.
“La’ós lori ami-nia naran rasik, maibé lori Kristu hanesan manu-ain João Baptista dehan, Kristu sei sai boot no ha’u sei sai ki’ik liután. Buat ne’ebé fó korajen hodi ami na’in rua laran-metin mak “ha’u horik iha imi-nia leet, ho fuan ne’ebé nakonu ho ksolok no rekoñese Nai Maromak nia grasa ne’ebé la nahas atu ami bele la’o,” katak Pe. Francisco.
Selebrasaun litúrjia ordenasaun saserdotál ne’ebé hala’o iha Igreja parókia Nossa Señora do Carmo Zumalai, hetan partisipasaun másimu husi familia diákonu nain-rua nian, Bispu Dioseze Baucau, Dom Basilio do Nascimento, representante Papa Francisco iha Timor-Leste Monsinor Marcus, padre sira, diákonu, madre sira komunidade relijioza, seminarista, no sarani sira husi Dioseze Maliana, Dili no Baucau.(*)