Tempotimor (Kovalima)-Segunda-feira (29/11/2021) ohin, ekipa Konsellu Veteranus Munispál Kombatentes Libertasaun Nasionál (KMKLN) kontinua halo verifikasaun ba dadus 518 iha aldeia Lela, suku Holpilat ne’ebé rejistu iha 2009 nu’udar kandidatura ba veteranus.
“Ohin Kandidatura Veteranus sira ne’ebé partisipa iha funu klandestina ne’ebé rejistu iha tinan 2009 hamutuk 518 iha aldeia ne’e, molok verifika sei halo juramentu ba Bandeira RDTL no Bandeira FALINTIL hodi hein rezultadu husi komisaun sira,” dehan responsável Nurep Holpilat, Candido Gusmão “Mameran At” iha Aldeia Lela, Ohin (29/11).
Veteranu sira ne’ebé la hamutuk ona ho ita (mate ona), maibé rejista ona bele reprezenta husi oan ka kaben-fen, hodi hato’o ba komisaun verifikadór dadus husi munisípiu no nasionál.
Reprezentante Administradór Munisípiu Covalima, Fransisco Tata Mero agradese ba ekipa komisaun verifikasaun dadus antigus kombatentes da libertasaun nasionál ne’ebé kontinua verifika dadus kandidatura veteranus ne’ebé rejista ona iha 2009.
“Ha’u agradese tebes ba ita-nia ekipa verifikasaun dadus ne’ebé kontinua verifika dadus sira ne’ebé rejistu iha 2009, ohin sira mai atu foti dadus ne’ebé mak ita-boot sira hala’o husi 1975 mai leten, tanba ne’e husu ba ita-boot sira konta ho istória lolos, buat ne’ebé ita-bot sira hala’o, tanba liuhusi intervista mak foin hatene lolos ema na’in hira mak hala’o funu, nomós husu ba responsável sira tenke hatene ita-boot sira-nia labarik sira ne’ebé iha tempu ne’ebá hamutuk ho imi,” Nia dehan.
Alende ne’e Prezidente Komisaun Organizadora ba verifikasaun dadus veteranus munisípiu Kovalima, Francisco Doutel Sarmento “La Mesak” husu jkandidatura labele tauk atu ko’alia sai lia loos.
“Husu ita-boot sira ne’ebé kandidatura verifikasaun dadus veteranus rejistu iha tinan 2009 labele tauk atu ko’alia sai buat ne’ebé mak imi hala’o no hasoru iha tempu ne’ebá, tanba husu ita-boot sira ami mai ohin la’ós fó sai rezultadu kedas ba ita-boot sira-nia partisipasau iha funu, ami sei intervista ita-boot sira, depois ami lori imi-nia dadus sira ne’e merese atu hetan duni ka lae, ne’ebé ami ohin sei mai foti dadus, depois mak fó sai rezultadu,” nia tenik.
Enkuantu komandante forsa armada libertasaun nasionál timor-leste sub rejiaun IV asistente polítika militar atuál Júlio da Conceição “Loro Mesak” hateten, ekipa verifikasaun mai la hare kor partidu, maibé mai atu rona imi-nia istória durante partisipa iha funu ba libertasaun Timor-Leste nian.(*)
