Tempotimor (Kovalima)-Autoriedade postu administrativu Fatululik, munisípiu Kovalima triste tanba komunidade abandona Bandeira Nasionál iha serimónia arear bandeira nian.
Ba kestaun ne’e Administardór interinu postu administrativu Fatululik, Leonardo Moniz triste tebes tanba atu arear (hatun) bandeira nasionál povu halai hotu ba uma.
“Tuir loloos ne’e hatun bandeira hotu mak fila, ne’ebé ba oin labele hanesan ne’e tan, tanba ne’e ha’u husu autoridade lokál sira tenke kontrola máximu nia povu sira, ne’ebé hanesan administradór triste tebes ho sira-nia hahalok ne’e, tanba ne’e falta respeitu, falta de nasiolizmu no patriotizmu,” nia informa ba www.tempotimor.com hafoin arear bandeira nasionál iha Fatululik, Domingu (28/11).
Nia afirma, “agora atu hatún bandeira ema komesa menus, ida ne’e hatudu katak povu mai atu hadahur de’it la’ós mai tuir festa proklamasaun da indenpendénsia ne’e ho fuan ho laran,” katak Nia.
Iha sorin seluk reprezentante juventude suku Taroman, Aniceito Moniz sente triste ho joven no komunidade sira-nia hahalok, tamba atu hatun Bandeira RDTL ema komesa menus.
“Hanesan juventude triste tebes, tanba ita ladun konsidera ita-nia loron istória ne’e, ita sente loron ne’e hanesan babain ida,” Aniceito tenik.
Enkuntu komandante parada ne’ebé lakohi aprezenta nia identidade kestiona ba autoriedade Fatululik, tanba arear de’it bandeira nasionál iha tuku 15:00 lokraik.
“Se hanesan ne’e labele konvida ami, agora ami sei iha dalan foin atu tun ba, sira hatun ona bandeira, ne’e labele, loloos ne’e hatun bandeira ne’e tuku 17:00, agora sira hatun bandeira RDTL iha tuku 15:00 ne’e, se mak hanorin sira, ne’e ita lakon funu, ne’ebé ba tenke hadi’a, ne’e krimi,” nia hatete..
Observasaun www.tempotimor.com iha resintu arear bandeira nasionál iha Fatululik ne’e, partisipa de’it mak estudante no komunidaade menus tebes iha serimónia ne’e joven no komunidade ne’ebé hela dook fila uluk, bainhira bandeira RDTL seidauk arear.(*)
