Tempotimor (Covalima)-Koordenadora Pradet Fatin Hakmatek Covalima, Imelda Imaculda Morreira imforma, kazu fen ho la’en soe malu dadaun buras iha Munisípiu Covalima, tanba kauza husi ekonomia familiar ne’ebé fraku.
“Kazu fen la’en soe malu ne’e, hun mai husi fen la’en deskonfia malu no ekonomia uma laran no mós husi violensia domestika, maibé dala barak akontese tanba, kauza husi ekonomia,” dehan nia, kuarta (15/12).
Tanba ne’e, husu ba feto maluk sira labele depende de’it ba mane, maibé hala’o mós negósiu ki’ik ruma atu reforsa ekonomia uma laran.
“Nune’e husi mane maluk sira abandona maluk feto sira, bele buka moris husi dalan halo negósiu sira hanesan loke kios no soru tais no hakiak animál manu, fahi sira no seluk tan”, nia dehan
Tanba, kazu ne’ebé Pradet rejistu husi Fulan-Jullu to’o Novembru tinan 2021 hamutuk 19 kompostu husi kazu abandona, violénsia doméstika, violénsia sexual, trafiku umanu no violénsia fíziku no dadaun aprezenta ona ba Ministériu Públiku.
Kordenadora ne’e, husu ba populasaun sira iha Covalima nafatin pasensia ho fuan boot atu bele hamenus kazu hirak ne’ebé númeru aas iha Covalima. (*)
