Tempotimor (Covalima)-Komunidade husi Aldeia Lakalese, Suku Datotolu, Postu Administrativu Fohorem hulan motor hodi hakat mota Tafara ba Postu Administrativu Suai Vila, Munisípiu Covalima, tanba laiha ponte.
Tanba ne’e, komunidade Aldeia Lakalese, Moizes de Andrade husu ba Ministériu Obras Publiku (MOP) liu-liu iha Munisípiu atu haree, tanba ponte laiha, defisil tebes atu halo movimentu ba mai iha tempu udan.
“Ami sente triste tebes, tanba tempu udan hanesan ne’e, difikulta tebes ami komunidade atu ba hola sasan ruma iha merkadu Suai,” nia dehan, segunda (10/01).
Nia haktuir, tempu udan bainhira mota boot, kareta labele liu no motor mak bele, maibé komunidade hulan hafoin hakur mota Lakalese.
“Ema ne’ebé kareta iha labele sa’e mai no husi foho mós labele tun ba Suai, só motor mak bele, maibé volume mota tun ituan mak ami mane na’in-5 ba leten tenke hulan hodi hakur mota ne’e, maibe mota boot ne’e labele liu,” nia dehan
Nune’e, Xefe Suku Datotolu, João Agustino Resi informa, dala barak hato’o ona preokupasaun ba Munisipiu no MOP, maibé to’o agora seidauk hetan resposta ruma.
“Iha tempu udan hanesan ne’e, mota Tafara Lakalese impaktu tebes ba ami Suku Datotolu, Suku Lactos no Postu Fatululik, ne’ebé ami komunidade atu halo atividade iha Suai, obrigatóriu hulan motor de’it hodi hakur mota,” nia afirma
Entertantu, Suku Datotolu iha ninia populasaun hamutuk rihun 1,672-resin no kontinua husu ba MOP atu konstrui ponte iha mota Tafara Lakalese, Suku Datotolu, Postu Administrativu Fohorem, Munisípiu Covalima. (*)
