Tempotimor (Covalima)-Sidadaun feto ida ho naran inisial JdS idade 38 husi Munisípiu Covalima ne’ebé hela iha Indonesia desidi halai ona mai Timor iha loron 09 fulan-janeiru tinan 2022 no husik hela oan na’in-3, tanba hetan bei-beik agresaun fíziku husi nia la’en.
Sidadaun ne’e, hanesan vítima ida ba akontesimentu iha tinan 1999 ne’ebé hetan violasaun sexsual husi militár Indonesia sira iha igreja Ave Maria Suai.
Manuel Soares hanesan Aman ba JdS konta, hahú horiseik loraik (09/01) maizumenu tuku 3:00 oras timor-leste (otl), nia halai husi Metamauk indonesia mai Timor, to’o ohin dader tuku 4:00 otl madrugada foin to’o iha Fronteira Salele Covalima.
“Horiseik jam tiga nia halai sai husi Metamauk ka nanfalus ne’e, to’o jam empat nia to’o batas ne’eba, nia tun husi motor lansung halai liu husi Mota laran mai liu, nia halai mai tanba nia Laen baku bebeik nia ho nia oan sira hodi ameasa dehan “o hau Oho o” entaun hau nia oan sente moras la diak nia halai mai, ne’e maka horikalan hau ho polisia sira ba buka konsege hetan duni hau nia oan,” nia haktuir iha Bairo-Kosta bainhira Ekipa Saúde izola JdS iha kuarentina, segunda (10/01).
Aman husi JdS ne’e, desidi sei la haruka nia oan feto fila ba Indonesia, tanba JdS mós sai vítima ba igreja Ave Maria Suai iha tinan 1999.
“Hau Haruka nia la fila ona, tanba nia la’os refuziadu, maibé vítima ba igreja Suai ne’e nian, ne’ebé Fundasaun Alola ne’e mai husi nia, tanba iha 1999 Amu Lulik ho sarani sira mate barak iha Igreja Suai ne’e, nia mak pembuka’an menghubungan Mane.
DdS iha oan nai’n tolu, oan dahuluk forma ona uma ka’in, oan daruak no ikus sei hala’o hela nia estudu iha Kupang Indonésia.
Dadaun sidadaun JdS sei kumpri hela kuarentina iha Bairo Kosta Suai durante semana ida, maske simu ona vasina moderna iha Indonésia.
To’o notisia ne’e, públika www.tempotimor.com halo konfirmasaun ba autoridade seguransa PNTL Covalima, maibé sidauk iha resposta, tanba segundu komandante sei okupadu hela ho servisu seluk. (*)
