Tempotimor (Covalima)-Primeiru Ministru (PM), Taur Matan Ruak halo dialogu hodi troka hanoin ho povu munisípiu Covalima molok mandatu hotu.
“Molok ha’u nia mandatu atu hotu sei vijita ita boot sira, ha’u halo esforsu ida ho delegasaun tomak ohin ita hasoru malu iha fatin ida ne’e hodi troka hanoin, saida mak ita halo tiha ona, dezafius no problema saida mak ita hasoru i haree hamutuk oinsa mak ita la’o ba oin diak liu tan”, dehan PM iha Covalima, tersa (11/01).
Nune’e, xefe governu espera, liu husi dialogu ne’e, bele halo ema hotu hamutuk hodi dezenvolve nasaun diak liu tán.
“Loron ba loron tempu ba tempu dezafiu no obstakulu sira satan ita nia lala’ok jornada ba oin, entaun tenke hametin ita nia kbi’it no vontade hasoru dezafius sira ne’e, ultrapassa dezafiu sira atu bele lori nasaun ne’e ba oin, ha’u bele inumera dezafiu balu ita dezafiu balu ke ita ultrapasa liliu iha governasaun ida ne’e,” PM afirma
Maske hasoru dezafiu ne’ebé mosu hanesa krizi politika, pandemia Covid-19 no problema oi-oin, maibé Governasaun ne’e, normalmente la’o ho normal no konsege ultrapasa to’o nia rohan.
Entertantu, PM Taur halo dialogu ho povu Covalima ho tema reforsa rejilensia nian iha Aeroportu Komandante, Kairala Xanana Gusmão Holbelis, Postu Administrativu Suai ne’ebé hetan partisipante maximu husi komunidade Postu Administrativu hitu iha Munisípiu Covalima. (*)
