Tempotimor (Covalima)-Uniaun Agrikultura Munisípiu Covalima (UNARCO) hamutuk ho organizasaun Permatil, Kadalak Sulimutu Institutu (KSI) inklui Instutu Edukasaun Popular (IEP) hamutuk ho membru grupu halo konservasaun ba bee no rai iha aldeia Lokeu, suku Debos Postu Suai.
Sekretáriu Jerál Uniaun Agrikultura Munisipiu Covalima, Rosalino Pereira hatete, objetivu husi konservasaun ne’e oinsa bele hamoris fali bee matan tuan ne’ebé maran bainhira tempu bailoro.
“Atividades ne’ebé ami halo iha Aldeia Lokeu ne’e kona-ba konservasaun bee ho rai, nia funsaun kona-ba konservasaun bee ho rai ne’e maka ita halo debu no travasaun ba sira, ne’ebé ami fiar katak atividades ida ne’e ita bele hamoris fali bee matan tuan ne’ebé maran iha tempu bailoron,” dehan Rosalino ba jornalista sira iha Aldeia Lokeu, Ohin (21/01).
Rosalino esplika durante ne’e UNARCO halo ona konservasaun ba bee no rai iha postu Fatumea.
“Konservasaun ba bee no rai ida ne’e ami hamutuk ho kolega sira husi Parmatil halo ona konservasaun iha Fatumea, postu vila, ida iha postu Maukatar suku Holpilat, aldeia Lela no agora dadaun ami iha Lokeu foho,” tenik Rosalino.
Enkuantu bee-matan tuan ida ne’ebé lokaliza iha fatin ne’e, bainhira tempu bailoro bee-matan refere maran halo komunidade sira susar atu asessu ba bee-moos.(*)
