Tempotimor (Covalima)-Hafoin Eskola Sekundária Jerál Públika (ESJP) Suai anúnsia rezultadu estudante finalista na’in 696 ne’ebé ho rezultadu aprovadu 100% maka inan-aman agradese ba estrutura eskola nian.
Reprezentante inan-aman husi estudante finalista, Martino Amaral Cova agradese ba diretór eskola no mestri sira tanba durante ne’e fó duni tempu hodi hanorin oan sira.
“Ita agradese ba ita-nia diretór eskola ida ne’e tanba ita hotu hatene katak duránte iha nia mandatu nia halo mudansa los ba eskola ida ne’e, dalaruma nia hasoru difikuldade ruma sempre kontaktu ha’u, i hamutuk konsege rezolve difikuldade ne’ebé eskola infrenta,” dehan Martino iha ESJP Suai, Sábadu (22/01).
Iha parte seluk, diretór ESJP Suai, Francelino Freitas Carvalho agradese ba profesór sira tanba servisu hamutuk maka dezenvolvimentu foin la’o.
“Ha’u sente tuir loloos apresisaun la’ós ba ha’u, tenke apresisaun mós ha’u-nia profesór sira ne’ebé fó aan tomak servisu hamutuk ho ha’u hodi dezenvolve eskola, ha’u hanesan diretór oinsa halo jestaun para utiliza osan inan-aman ne’e ho di’ak” katak Francelino.
Diretór ne’e mós afirma, iha loron 6 Jullu tinan kotuk vise Ministru Edukasaun Joventude no Desportu (MEJD), António Guterres mos apresia ba dezenvolvimentu ha eskola ne’e bainhira halo kampaña vasinasaun COVID-19 iha eskola refere, tanba kontribuisaun maka’as husi inan-aman husi estudante sira.
Diretór eskola ne’e esplika, estudante finalista hamutuk na’in 696 kompostu husi Siénsia Teknolójia hamutuk na’in 333, Siénsia Sosiais Humanidades hamutuk 363.
“Rezultadu ita bele dehan pozitivu tanba husi estudante finalista anu eskolar 2021 ne’e ho total 696 sira seluk la partisipa iha Ezame Nasionál, na’in ida mate, ne’ebé siknifika total estudante husi estudante hirak ne’e pursentu 100% passa iha ezame nasionál,” dehan Diretór Francelino.(*)
