Tempotimor (Covalima)-Tuir Country Manajer Kompañia Internasionál Timor Resources, Filomino Andrade katak, perfurasaun mina iha posu Feto Kmaus seidauk hatene iha valór ekonomia ka lae, tanba sampel ne’ebé haruka ba laboratóriu Indonézia atu halo teste seidauk haruka fila mai Timor-Leste.
“Sampel ne’ebé hasai ba halo teste iha laboratóriu Indonézia ne’e mak to’o agora seidauk rona rezultadu, Maibé kuandu sampel hirak ne’e mak bele fó rezultadu bele perfura kle’an liután kraik, situsaun imformasaun nakfera ne’e mak hanesan konkluzaun,” dehan Filomino ba Jornalista sira iha área perfurasaun mina Liurai, Segunda (07/02).
Manajer ne’e akresenta, aleinde teste ne’ebé seidauk mai, atividade perfurasaun mina iha posu Feto Kmaus seidauk to’o targetu perfunidade 1400-resin ne’e, tanba foin to’o metru 600-resin, tanba impaktu husi presaun gas ne’ebé maka’as no provizóriu suspende perfurasaun hodi hein rezultadu husi estudu jeolójia.
“Nia kuantidade ne’ebé ita hetan ne’e seidauk identifika atu bele halo produsaun, tanba sampel haruka ba ne’e seidauk fó sai rezultadu, ne’ebé kompañia seidauk deside atu para perfurasaun so suspende de’it, hodi hein rezultadu husi estudu jeolójia,” tenik nia
Entertantu, ba dadaun ne’e kompañia seidauk bele hateten rezultadu mina iha posu Feto Kamaus iha valór ekonómia ka lae, tanba aleinde rejultadu teste sampel mina ne’ebé seidauk to’o mai husi laboratóriu Indonézia nomós perfundidade seidauk atinje tarjeitu kompañia nian.(*)
