Tempotimor (Covalima)-Komandante Polísia Nasionál Timor-Leste (PNTL), Munisípiu Covalima, Superintendente Polísia Basílio de Jesus katak, komandu PNTL Covalima preparadu hodi asegura festa demokrásia ka kampaña Eleisaun Prezidensiál (ElPres) period 2022 to’o 2027 ne’ebé sei realiza iha fulan oin.
“Ita sei iha formatura jerál fó orientasaun servisu operasaun iha Covalima dentru periodu kampaña hodi prepara membru hotu envolve iha tereñu, ita laiha feriadu hothotu tenke stanby alerta hodi asegura kampaña,” dehan Superintendente Polísia Basílio ba jornalista sira iha komand PNTL Covalima Santa Rosa, Tersa (22/02)
Formatura jerál ne’e komandu munisípiu Covalima sei hahú iha segunda semana oin atu alerta ba membru sira hodi garante seguransa durante kampaña to’o iha eleisaun prezidensiál.
Basílio nia esperansa mak durante kampaña to’o eleisaun prezidensiál remata la akontese disturbiu ruma, tanba dadaun ne’e komandante estuda hela situasaun iha Covalima.
“Ha’u nia esperansa katak sei la akontese buat ruma, ha’u la’o barak hodi estuda situasaun iha Covalima atu mosu ameasa ha’u bele hatene hanesan Timoroan agora la’ó tempu ona atu konfronta malu, tempu atu aplika ita-nia demokrásia liuhusi momentu hanesan ne’e tenke hatudu ita-nia maturidade polítika no dignidade polítika ba públiku no mundu katak ita mós bele,” dehan Basílio.
Enkuantu molok loron tolu atu realiza eleisaun presidensiál membru PNTL sira destaka ona iha sentru votasaun sira ne’ebé estabese iha munisípiu Covalima. Tanba tuir dadus hosi STAE Covalima estabele sentru votasaun 80 ho estasaun votasaun 92 no eleitór ne’ebé atu vota hamutuk rihun 47,807 husi postu administrativu hitu iha Munisipiu Covalima.(*)
