Tempotimor (Covalima)-Relasiona ho udan boot ne’ebé akontese iha teritóriu Timor-Leste laran tomak, mak rezulta ponte rua iha munisípiu Covalima tenke kotu tanba korente mota maka’as.
Obsevasaun www.tempotimor.com iha ternu nota katak, ponte ne’ebé hetan estragus husi korente mota nian mak hanesan ponte raiketan liga suku Labarai postu Suai ba suku belekasak Postu Maucatar no suku Camenasa postu Suai no ponte seluk mak ponte Lo’o-mea ne’ebé liga suku Beko postu Suai no suku Tashilin postu Zumalai.
Ponte raiketan ne’ebé kotu ona fó impaktu ba movimentasaun transporte públiku inklui estudante sira husi suku Labarai postu Suai ne’ebé hala’o estudu iha Eskola Bázika Sentral (EBC) Dais suku Belekasak postu Maucatar.
Ba kestaun ne’e, reprezentante komunidade suku Labarai, Jino da Cruz husu ba governu atu halo intervensaun imediata, tanba bele fó amiasa vida estudante sira husi suku Labarai ne’ebé halo estudu iha EBC Dais.
“Ami husu ba governu se bele halo intervensaun imediata, tanba ponte ne’e ameasa tebes ba komunidade husi postu Zumalai no postu Suai atu halo viajen ba mai, nomós estudante husi suku Labarai sementara labele ba eskola, tanba eskola iha ponte sorin, ne’ebé sira labele hakur mota boot ne’e, ne’ebé husu dala ida tan ba Ministériu Obras Públiku (MOP) atu hato’o direta ba nasionál hodi atende,” dehan Jino da Cruz ba jornalista sira iha fatin akontesimentu, Tersa (22/02).
Enkuantu ba dadaun ne’e ponte rua mak kotu hodi difikulta ba movimentasaun transporte públiku nomós komunidade sira, maibé iha estrada alternativu seluk ne’ebé komunidade sir abele utiliza mak auto Estrada.
Ba ponte rua ne’ebé hetan estragus husi udan no korente mota nian ne’e, www.tempotimor.com tenta konfirma ho diretór Obras Públiku munisípiu Covalima nian, maibé nia parte seidauk bele resposta tanba sei okupadu ho servisu.(*)
