Tempotimor (Covalima)-Aban (23/02/2022), Komisaun Nasionál ba Eleisaun (CNE) munisípiu Covalima sei realiza paktu unidade iha munisípiu Covalima kona-ba Eleisaun Prezidensial tina 2022 to’o 2027.
“Atu realiza paktu unidade ne’e, CNE Covalima halo hela preparasaun téknika tanba bazeia loron ne’ebé deside husi prezidente CNE ho nia komisáriu sira liuhusi plenária iha CNE paktu unidade iha Covalima ita sei realiza iha aban, ne’ebé ami-nia preparasaun atinje ona 65%, tanba ami identifika ona lia-na’in sira husi postu administrativu ne’ebé pertense iha Munisípiu Covalima atu partisipa iha serimónia paktu unidade ne’e” dehan Diretór CNE Munisípiu Covalima Hermenegildo de Sena iha knaar fatin CNE Kampung-Baru, Tersa (22/02).
CNE nia programa realiza paktu unidade laiha mudansa hanesan uluk ne’ebé mak CNE sempre realiza, tanba ne’e iha serimónia refere CNE mós konvida lia-na’in sira ne’ebé hetan ona sertifikadu husi Sekretáriu Estadu Arte no Kultura.
Diretór ne’e komenta, hafoin realiza paktu unidade iha nivél munisípiu, lia-nain na’in ida husi munisípiu Covalima sei partisipa paktu unidade iha CNE nasionál ne’ebé sei realiza iha loron 28 fulan fevreiru bazeia ba deliberasaun CNE númeru 26/12/2017 aprovasaun regulamentu internu CNE loron 13 Dezembru 2017.
“Atribuisaun kompetensia ne’ebé mai husi artigu 65, Konstituisaun RDTL prevé iha pontu 2, artigu 11, Lei nú 7/2016, Lei ba Orgaun Administrasaun Eleitorál hatete, Estrutura Orgánika Sekretariadu permanente CNE nian sei aprova tuir Lei, no pontu 3 husi lei refere hatete, CNE mak sei elabora no aprova rejimentu ba ninia sesaun plenária sira, ne’ebé tenke publika iha Série II do Jornal da Repúblika. tuir Konstituisaun RDTL Artigu 65 kona-ba Eleisaun sira,” katak Nia.
Entertantu iha artigu 65 Konstituisaun RDTL ne’e mós previstu husi pontu ida to’o neen katak; 1. Órgaun eleitu soberania nian ho podér lokál sei hili tuir eleisaun, husi eleisaun universál, livre, diretu, sekretu ema ida votu ida, no periódiku. 2. Resenseamentu eleitorál ne’e obrigatóriu, ofisiál no ida de’it no universál no sei atualiza iha eleisaun ida-idak. 3. Kampaña eleitorál hala’o tuir prisípiu hirak tuirmai ne’e: a) Liberdade ba propaganda eleitorál; b) Oportunidade no tratamentu hanesan ba kandidatura hotu-hotu; c) Imparsialidade na’in ulun boot públiku sira-nian kona-ba kandidatura; d) Transparénsia no fiskalizasaun sura votu nian. 4. Konversaun votu nian iha mandatu hala’o tuir sistema reprezentasaun proporsionál. 5. Prosesu eleitorál sei regula tuir lei. 6. Órgaun independente maka sei tau matan ba resenseamentu no eleisaun sira. Lei maka estabelese orgaun ne’e nia kompeténsia, kompozisaun, organizasaun no nia knaar.(*)
