Tempotimor (Covalima)-Komisaun Nasionál ba Eleisaun (CNE) realiza serimonia rituál tuir tradisaun Munisípiu Covalima nian hodi garante pás no estabilidade nasionál durante kampaña no Eleisaun Prezidensiál (ElPres) ba periódu 2022 to’o 2027.
“Ohin ami lia-na’in hosi postu adminisministrativu hitu hamutuk iha ne’e, hodi halo rituál tuir tradisaun munisípiu Covalima nian hodi haree fahi aten, maibé husi fahi aten ne’e hatudu sinál pozitivu,” dehan lia-na’in Ancleto Amaral ba jornalista sira iha edifisíu CNE Kampung-Baru, Kuarta (23/02)
Serimónia rituál ne’e, nu’udar meiu ida atu harohan ba bei-ala no eroi sira, hodi haraik matak malirin mai komunidade tomak hanesan mós manifestasaun ida atu hato’o mensajen no rekomendasaun ba komunidade Timor laran tomak, espesiál komunidade iha Covalima no kandidatura ne’ebé mak atu konkore iha eleisaun preziensiál.
Lia-na’in sira mós husu ba kandidatura Prezidente Repúblika kria unidade pás no estabilidade i tenke laran moos, bainhira eleitu ba Prezidente Repúblika atu rona povu.
Iha fatin hanesan Komisáriu CNE ne’ebé destakadu iha munisípiu Aileu no Covalima, Carlito Martins hatete, CNE organiza rituál ida ne’e, atu hamulak ba lisan iha Timor laran tomak espesiál kultura munisípiu Covalima hodi hahú prosesu eleitorál.
“Objetivu prinsipál realiza rituál kultura ida ne’e ita ejize kandidatura PR iha obrigasaun atu obedese regra no proisedimentu legál ne’ebé regulariza prosesu kampañia politíka iha eleisaun prezidensiál,” nia dehan.
Komisáriu solisita, kanditatura Prezidente Repúblika atu divulga programa no planu estratéjiku politíka fó linguajen no mensajem ba povu kona-ba dezenvolvimentu nasionál intrese estadu nian labele uza lian provokativu.
Nune’e prosesu eleisaun ho livre, justu, pás tuir prinsípiu konstituisaun no lei sira inklui kandidatura sira tenke fuan boot no ulun malirin atu simu rezultadu eleisaun.
Iha sorin seluk, Administradór Munisípiu Covalima (AMC), Francisco de Andrade afirma, serimónia kultura refere, atu kria pás no estabilidade iha Covalima durante periódu kampaña to’o eleisaun prezidensiál.
“Ita hotu hatene kandidatura Prezidente Repúblika sira sei halo kampaña, maibé sira iha direitu ne’ebé hanesan, nune’e presija ita hotu nia kontribuisaun, durante kampaña Covalima labele sai baze ba konflitu, maibé Covalima sai baze ba unidade,” katak Francisco.
Francisco relembra katak, durante tinan hira liubá munisípiu Covalima nunka hamosu problema durante prosesu eleisaun.
Entretantu tuir planu CNE nian sei ensera ba serimónia rituál no kulturál ne’e iha loron 28 fulan fevreiru tinan ne’e, iha sede nasionál CNE.(*)
