Tempotimor (Covalima)-Servisu Saúde Munisípiu Covalima (SSMC) rejista ona eskola husi Pre-Primária to’o Sekundária hamutuk 30 ne’ebé preparadu atu simu vasina Pfizer.
Tuir Diretora Servisu Saúde Munisípiu Covalima (SSMC), Maria Fátima Moniz katak, servisu saúde munisípiu nian hahú prepra hodi simu vasina Pfizer doze dahuluk.
“Vasina Pfizer ne’ebé ita atu fó vasina ba labarik sira ho idade 12 to’o 17, ami sei iha faze preparasaun no enumerasaun ne’ebé iha eskola hamutuk 30, iha Covalima no sei halo planu, hafoin haruka pedidu ba iha nasionál,” dehan diretora SSMC, Maria ba jornalista sira iha nia kna’ar fatin Camanasa Sesta (25/02).
Atu hahú vasina Pfizer ba labarik ho idade 12 to’o 17 ne’e, bazeia ba planu no haruka pedidu ba iha nasionál, liliu ba iha Servisu Autónomu Medikamentu no Ekipamentus Saúde (SAMES), tuir númeru alvu ne’ebé rekola iha Covalima.
“Ami hala’o ami-nia planu hodi haruka pedidu ba iha nasionál, liliu iha SAMES tuir ita-nia númeru alvu, agora balun ami rekolla ona balun seidauk, nune’e ami seidauk hetan númeru ida ne’ebé loloos, maibé ami sei realiza enkontru konsellu ami bele hatene,” katak Nia.
Vasina Pfizer bazeia ba tempu ho nia durasaun fulan ida de’it. Entaun servisu saúde Covalima tenke aselera lalais, tanba iha Covalima haree liu ba eskola primária no sekundária ne’ebé ho idade 12 to’o 17.
Entertantu antes ne’e, iha loron 18 fulan outubru 2021, Ministériu Saúde (MS) lansa vasina Pfizer doze dahuluk ba labarik sira ho idade 12 to’o 17 iha munisípiu Dili no Likisa.(*)
