Tempotimor (Covalima)-Tuir Supervizór Eletrisidade de Timor-Leste Empreza Públika (EDTL-EP) Munisípiu Covalima, Alexandre Seran katak, servisu EDTL Covalima monta ona prepagu ba postu administrativu tolu liu ona atus ualu.
“Ami monta ona kontadór prepagu iha postu Fatululik no Maucatar hamutuk 530, ne’ebé komunidade atu sosa pulsa eletrisidade nian mós la susar, tanba kompañia Suai oan mós fa’an kedas pulsa iha postu ne’ebá,” dehan Supervisor EDTL ne’e ba jornalista sira iha gabinete, Tersa (08/03).
Nia hatutan, dadaun ne’e ekipa EDTL kontinua monta kontadór prepagu atus tolu iha postu administrativu Zumalai.
“Postu Zumalai iha parte Lepo no Zulo ekipa na’in rua kontinua monta prepagu iha ne’ebá ne’e ba etapa primeiru, ne’ebé kontadór prepagu hamutuk 300 no komesa horseik i sei kontinua monta iha postu Fatumea, Fohorem, no Tilomar ne’ebé seidauk halo instalasaun ba kontadór,” Nia tenik.
Entertantu totál funsionáriu ne’ebé hala’o servisu iha EDTL munisípiu Covalima hamutuk na’in 18 no kazuais na’in 10 hodi apoiu servisu EDTL munisípiu. Tanba ne’e supervizór husu komunidade Covalima ne’ebé infrenta problema kona-ba eleletrisidade bele hato’o ba servisu EDTL nune’e bele hadi’a.(*)
