Tempotimor (Covalima)-Hafoin udan boot durante loron rua iha munisípiu Covalima, komunidade hamutuk uma-ka’in ualu iha aldeia Loro, suku Suailoro, postu administrativu Suai tenke sai vítima, tanba afetadu husi udan boot refere.
Komunidade Maria de Jesus husi aldeia Loro sente triste, tanba inundasaun ne’e estraga hotu sasan sira iha uma laran.
“Ami triste tebes tanba bee sa’e iha ami-nia bairu laran ne’e, ami-nia sasan sira aat hotu, bee sa’e to’o ain-tur, ne’ebé roupa sira no televisaun no buat dapur nian aat hotu,” Hateten reprezentante komunidade ne’e ba jornalista sira horseik (09/03).
Maske iha hela situasaun triste nia laran, maibé vítima agradese ba ekipa protesaun sivíl munisípiu Covalima, tanba hetan intervensaun kedas hodi apoiu aihan no sasan seluk ba vítima hirak ne’e.
“Ami kontenti oituan tanba sira husi ekipa protesaun sivíl munisípiu nian ajuda netik ami ba aihan hanesan fos, mina, supermi, sardina, susuben, kaffe, masin-midar, biscuit. Ne’ebé agradese tebes ba sira-nia apoiu tomak ida ne’e, maske oituan, maibé nia valor ne’e boot ba ami,” Dehan nia.
Iha sorin seluk Koordenadór Protesaun Sivíl Munisípiu Covalima, Dinis Perreira katak, parte ekipa protesaun sivíl apoiu ona uma ka’in ualu ne’ebé hetan afeta husi inundasaun.
“Ohin lokraik ne’e tun kedas ba fatin inudasaun hodi apoiu aihan babain ita dehan food item no non-food item ba komunidade uma-ka’in ualu ne’ebé sira-nia sasan hetan estragus husi inundasaun,” Hakotu nia.(*)
