Tempotimor (Covalima)-Xefe aldeia Kunain, suku Matai, Simão Gusmão kestiona servisu extensionista husi suku no iha postu administrativu hitu, tanba servisu ladun máximu, nune’e tinan 2022 komunidade menus halo to’os.
“Extensionista postu ka suku sira ne’e servisu ladun máximu, dalaruma halimar mak barak liu iha terenu, ne’e tuir ami nia observasaun iha baze ne’eba? tanba komunidade ba tinan ida ne’e barak mak la halo to’os ona, komesa menus halo to’os, ne’e hatudu katak extensionista sira la halo servisu,” hateten xefe aldeia Kunain, Simão ba www.tempotimor.com iha knar fatin, Kinta (10/03).
Ba kestaun ne’e, nia parte sujere ba Ministériu Agrikultura no Peskas (MAP) atu halo polítika ida hodi haree ba komunidade ka to’os na’ain sira ne’ebé hahú menus halo to’os, tanba tinan ne’e komunidade Covalima barak la halo to’os no konsumu de’it hahan husi estranjeiru hodi hamosu moras oioin.
“Ha’u sujere de’it ba MAP fó informasaun ba komunidade sira iha baze no toma atensaun ba komunidade sira atu kontinua halo to’os iha postu hitu, tanba informasaun ne’e importante tebes ba komunidade sira, Nune’e bele redús importasaun iha rai liur, depois informasaun labele fahe de’it iha vila, persiza mós iha área rural sira, tanba sira komunidade maioria halo to’os iha rural nomós halo to’os sei uza matéria manuál, mas ema agora ne’e halo to’os moderniza ona,” katak nia.
Hatán ba kestaun ne’e, Diretór Servisu Agrikultura no Peskas (SAP) munisípiu Covalima, Domingos Gusmão katak, extenxionista husi postu administrativu hitu difikulta ba transporte, tanba kondisaun motor barak ladi’ak ona.
“Kona-ba extensionista sira-nia servisu ita labele fó sala ba sira, tanba sira-nia motor ida simu ne’e barak mak aat ona, maibé sira kontinua servisu tun ba baze hodi observa to’os na’in sira nomós ida mak extensionista postu sira laiha manutensaun ba sira-nia motor no laiha vensimentu ruma, ne’ebé di’ak ha’u sei toma nota no sei hatutan informasaun ne’e ba nasionál,” Katak nia.
Diretór ne’e mós promote sei haree no hadi’a nomós sei hato’o extensionista sira-nia problema kona-ba transporte ne’ebé durante ne’e sira infrentra hela.(*)
