Tempotimor (Covalima)-Atu hakmaan no haforsa rendimentu ekonómia familia nian, maka komunidade sira iha suku Beco harii grupu kréditu ida ho naran Moris Foun hodi fó kréditu ba komunidade sira ne’ebé halo negósiu ki’ik iha aldeia no suku.
Tuir xefe Grupu Moris Foun (GMF), Celeste dos Reis katak, objetivu husi hari’I grupu kréditu iha sede suku ne’e atu ajuda maluk sira ne’ebé hakarak halo negósiu ruma.
“Ami-nia grupu ne’e hetan apoiu husi Mercy Corps hanesan kalkulatór, livru tavanas ka rai osan nian, kofre rai osan nian nomós lapis, ne’ebé fulan ida sira halo monitorizasaun ba ami-nia grupu dala ida rua no grupu ne’e lao oinsa sira akompana to’o ágora,” dehan xefe Grupu Moris Foun Celeste ba jornalista sira iha aldeia Aidantuik Kinta (10/03).
Nia hatutan, Grupu Moris Foun ne’e eziste durante fulan neen ona, nune’e osan ne’ebé hatama ba grupu ne’e iha ona $871.75.
“Membru grupu ne’e ami na’in 12, mane na’in ida feto na’in 11, entaun semana ida kada membru hatama osan husi dollar $1.00 to’o dollar $20.00, kuandu liuhusi $20.00 ne’e labele, ne’ebé ami hatama kada semana i ami-nia osan hamutuk $.871.75 dollar ona, maibé sura hamutuk ho ida ne’ebé ema empresta ne’e liu ona rihun rua. Depois, kuandu ema ne’ebé mai halo empresta iha grupu ne’e ami fó funan 15%, maibé ami iha laran mak foti entaun 10%,” katak Nia
Iha fatin hanesan, Koordenadór Mercy Corps, Filomino Maia husu ba Grupu Moris Foun atu rai no fó impresta osan ho sira-nia grupu, nune’e bele redus ka prevene kréditu osan iha banku.
“Husu ba grupu Moris Foun atu kontinua, labele para iha klaran, tanba liuhusi grupu hanesan ne’e inan-aman sira bele apoiu oan sira eskola no halo negósiu ki’ik, tanba grupu ne’e objetivu atu prevene inan-aman impresta osan husi banku ne’ebé ho funan boot no kritéria oioin, maibé ida ne’e lae, iha suku laran sira mak bele fó ka ajuda malu,” Nia tenik.
Entertantu koordenadór ne’e kontinua enkoraja membru sira atu labele para, tanba hamutuk ho grupu Moris Foun ne’e Mercy Corps hamutuk ho komunidade sira konsege harii ona grupu kréditu sanulu iha munisípiu Covalima.(*)
