Tempotimor (Covalima)-Organizasaun la’ós Governu (ONG) Mercy Corps Internasional hakma’an ona komunidade Aidamtuik nia terus liuhusi halo perfurasaun ba bee-moos ho metru 27 iha suku Beco hodi prepara tanki rezervatóriu ba komunidade sira aldeia Aidamtuik, suku Beco, postu administrativu Suai ne’ebe durante ne’e infrenta kona-ba bee-moos.
Iha serimónia inagurasaun ne’e, Koordenadór Mercy Corps, Filomino Maia katak, projeitu bee-moos ne’e hetan ingurasaun tanba servisu hamutuk husi Mercy Corps no komunidade Aidamtuik.
“Projeiru ne’e implementa hahú dia 12 de novembru 2021 no remata iha dia 4 de marsu 2022, nune’e ohin Mercy Corps entrega ona ba komunidade sira hodi bele uza ba loron loron,” Hateten Koordenadór Mercy Corps Filomino Maia ba jornalista sira iha Beco, Kinta (10/03).
Koordenadór ne’e akresenta, orsamentu ne’ebé Mery Corps finansia ba perfurasaun bee posu ne’e hamutuk rihun $5,954.20 dollar amerikanu. Tanba selu ba kompañia ne’ebé halo perfurasaun, kustu ba transporte inklui kustu ba servisu no seluk tan.
Iha sorin seluk xefe suku Beco, Arlindo Gomes agradese no apresia ba Mercy Corps tanba oferese ona bee-moos ba komunidade iha aldeia Aidamtuik.
“Ha’u apresia tebes ho ita-nia ONG Internasional Mercy Corps nia ajuda ba ha’u-nia komunidade sira iha ne’e, tanba durante sira halerik ba bee-moos, maibé ohin sira uza bee-mos ho di’ak, tanba ne’e husu ita boot sira tenke uza ho kuidadu no uza tuir oras,” dehan xefe suku ne’e ho haksolok.
Alende ne’e, reprezentante komunidade aldeia Aidamtuik, Celeste dos Reis kontente no agradese ba Mercy Corps kasu ona todan ne’ebé durante ne’e infrenta.
“Ami agradese no kontenti tebes, tanba babain ami kuru bee iha fatin dook, maibé ohin loron ami kuru iha ami-nia bairu laran ka uma kedas, ne’ebé agradese tebes ba maun sira,” Katak nia.
Entertantu benefisiáriu ba projeitu bee-moos ne’e hamutuk uma-ka’in 30 ho total populasaun 127 ne’ebé kompostu husi mane 61 no feto 66 ne’ebé hola parte ba aldeia Aidamtuik, suku Beco, postu Suai.(*)
