Tempotimor (Covalima)-Tuir Xefe Unidade Farmásia Ospitál Referál Covalima, Francisco Guterres de Araújo katak, aimoruk iha Ospitál Referál Covalima stock sei sufsiente hela atu atende ba pasiente sira.
“Aimoruk ne’ebé oras ne’e iha hamutuk item 346 atu halo atendimentu ba nesesidade pasiente sira nian iha ospitál ne’e stock sei sufsiente hela,” dehan Xefe Unidade Farmásia ORS, Francisco Guterres ba jornalista sira iha knar fatin, Kurta (16/03).
Nia haktuir bainhira item importante ba aimoruk balun mak laiha ka menus ona, parte ospitál buka dalan hodi rezolve kedas tanba ne’e kona-ba aimoruk iha ospitál laiha problema.
“Kuandu haree ba stock aimoruk menus ona parte ospitál tenke halo pedidu regular ba iha Servisu Autónomu Medikamentu no Ekipamentu Saude (SAMES), maibé aimoruk sira mai mak ladun apar parte ospitál tenke halo pedidu extra, kuandu sira husi SAMES atende ladun kompletu tenke halo fali pedidu emerjénsia ida, pedidu emerjensia laiha rezultadu nafatin tenke halo pedidu kompras ida ba hierakia ospitál hodi oinsa atu bele rezolve liuhusi dalan sosa aimoruk karik dalan ikus liu mak laiha pasiénsia tenke transfere pasiente husi Suai ba Ospitál Nasionál Guidu Valadares (HNGV) Dili,” katak Nia.
Fontes ne’e subliña, ho stock aimoruk ne’ebé sei sufisiénte, mak parte ORS kontinua halo atnedimentu ba komunidade sira ne’ebé kada loron mai hala’o tratamentu saúde.(*)
