Tempotimor (Covalima)-Bazeia ba sítiu turístiku Pura Germani ne’ebé lokaliza iha suku Salele ne’ebé oras ne’e nia paisajem komesa estragus mak Grupu Juventude Tilomar Kreativu hato’o proposta ba Movimentu Relijiaun Hindu Timor-Leste hodi apoiu fundu ba reabilitasaun sítiu refere.
Tuir xefe grupu Joventude Tilomar Kreativu (JTK), Charles Dão Jawa, proposta ne’ebé husi JTK ba Movimentu Relijiaun Hindu Timor-Leste konsege hetan aprovasaun ho montante orsamentu rihun ida, nune’e juventude sira ne’e bele uza hodi reabilita sítiu turístiku refere.
“Ami hatama proposta ba Movimentu Relijiaun Hindu Timor-Leste, sira apoiu orsamentu rihun $1.000 ba ami, entaun oinsa ami bele jere osan ne’e ho di’ak, para ba oin ami hadi’a fatin ne’e di’ak para atrai vizitante lokál no internasionál sira mai fatin ne’e, bele lori reseita mai komunidade sira,” Tenik xefe grupu JTK, Charles ba www.tempotimor.com iha suku Maudemo, Tersa (15/03).
Nia hatutan, grupu JTK ho voluntáriu reablita Pura Gremani Salele ho objetivu atu atrai públiku sira hodi hetan vijita fatin istóriku ne’ebé husik hela iha okupasaun Indonézia.
“Dadaun ne’e grupu hahú halo reabilitasaun ba Pura Agremani Salele ka uma kreda relijiaun Hindu nian, serbisu komesa halo lutu haleu pura ne rasik, tamba pura ne mós sai hanesan destinasaun turizmu relijiozu iha futuru, tanba ne’e ami halo proposta ida ba sira, hodi hetan apoiu orsamentu husi Movimentu Relijiaun Hindu Timor-Leste (MRHTL) ho montante orsamentu rihun ida.
Alende ne’e, xefe grupu JTK mós afirma kona-ba vizaun ho misaun grupu nian ne’ebé eziste atu promove no kapasita talentu juventude sira iha postu Tilomar no haree liubá área turizmu iha postu Tilomar, munisípiu Covalima.(*)
