Tempotimor (Covalima)-Tersa-feira (15/03/2022) ne’e Servisu Munisipál Seguransa Alimentar (SMSA) desimina informasaun kona-ba prátika di’ak seguransa alimentar no nutrisaun ba komunidade sira atu bele promove aihan lokál sira husi postu administrativu sira.
“Liuhusi desimina informasaun ba komunidade agrikultór sira iha suku ka postu sira ne’e, oinsa mak komunidade sira bele promove aihan lokál sira ne’ebé kada postu sira iha,” Hateten Diretór SMSA, Reinaldo Moniz Coli ba jornalista sira iha postu Fohorem, Tersa (15/03).
Tuir Reinaldo, populasaun Timor-Leste porsentu 30 mak infrenta seguransa aihan, tamba ne’e servisu seguransa alimentar kontinua enkoraja komunidade sira husi postu no suku sira atu promove aihan lokál sira.
“Populasaun Timor-Leste ho pursentu 30 mak infrenta em seguransa aihan, króniku, tamba labarik tinan lima mai kraik porsentu 46 sofre má-nutrisaun króniku no porsentu 42 taxa pobreza, porsentu 75 mak gasta ba sosa aihan importasaun, entaun liuhusi atividade ne’e bele redúz, tanba ita timor riku ho produtu lokál,” Nia tenik.
Nia husu ba komunidade iha Covalima oinsa bele halo inovasaun no transforma aihan husi matérial prima sira bele sai aihan ne’ebé di’ak liu, hanesan batar no hudi no seluk seluk tan.
Alende ne’e komunidade Maria Soares sente kontente, tanba bele hetan informasaun sira ne’ebé liga ho aihan lokál.
“Kontente tebes hodi partisipa iha programa ne’e, tanba ohin ami rona katak, aihan lokál iha nutrisaun di’ak ba ita-nia saúde, entaun ami kontente i sei prodúz barak liután ita-nia hahan lokál sira,” katak nia.
Entretantu iha prohrama desiminasaun ba seguransa aihan ne’e hetan partisipasaun máximu husi komunidade to’os na’in sira ne’ebé mai husi postu administrativu Fohorem no postu Fatumea, munisípiu Covalima.(*)
