Rai Potensiál ba Agrikultura Barak iha Covalima Abandonadu

Tempotimor (Covalima)-Tuir Diretór Servisu Agrikultura Munisípiu Covalima, Domingos Gusmão, rai sira iha potensialidade ba halo to’os no natar iha munisípiu Covalima oras ne’e barak mak abandona ona tanba maiória ema hetan subsídiu husi estadu barak.

“Tuir ita hotu nia haree no hatene saida mak akontese dadauk natar ho to’os ne’ebé durante ne’e abandonadu, ezemplu iha suku Labarai to’os barak mak la halo ona to’os maske rai refere iha potensialidade tebes ema la utiliza tanba ho hanoin ida ema barak mak oras ne’e hetan subsídiu husi estadu halo ema barak baruk halo ona to’os ho natar,” deklara Diretór SAMC, Domingos ba jornalista sira iha Administrasaun Munisípiu Covalima, Kuarta (16/03).

Read More

Nia afirma, subsidiu sira hanesan bolsa da mãe, veteranus, martires ho buat sira ne’e hotu ema dezmotivadu halo to’os no natar, inklui impaktu seluk mak ema la hanoin di’ak atu halo tan to’os no natar tanba merkadória.

“Problema mercadoria, tanba oras ne’e komunidade iha Salele prodúz hela pateka, bainhira koilleta lori mai butuk hela de’it iha merkadu Suai ema ne’ebé orsamentu uitoan sira bele tula ba iha kareta lori ba fa’an iha Dili, kuandu merkadu mak iha pemasaran di’ak ona ema hotu hakarak halo to’os no natar hodi prodúz produtu ne’ebé iha,” katak Nia.

Atu redús importasaun husi rai liur presiza hasa’e produsaun rai laran, depois atu hasa’e produsaun rai laran tenke explora ona área koletivu ne’ebé durante ne’e abandona maske rai ne’e poténsia agrikultura nian.

“Atu redús importasaun presija involve rekursu ne’ebé iha hodi utiliza ba rai ne’ebé abandonadu hela hodi bele hasa’e produsaun. Maibé iha parte ida rai sira ne’e abandonadu tanba orasmentu menus liu alokadu ba iha Ministériu Agrikultura no Peskas (MAP), satán mai iha nível munisípiu só iha orsamentu bens servisu, maibé orsamentu ba kapitál dezenvolvimentu no kapitál menór durante ne’e agrikultura munisípiu laiha, entaun labele halo buat ida,” katak diretór ne’e.

Solusaun atu redús importasaun husi rai liur presija tau osan boot ba iha MAP, atu nune’e hodi halo estensaun ba área koletivu ne’ebé iha no bele mós intensifika saida mak iha ona, hanesan natar no to’os sira.(*)

Related posts