Tempotimor (Covalima)-Diretór Notariadu Rejistu Sivíl (NRS) munisípiu Covalima, António Sarmento katak, husi janeiru to’o fevereiru tinan 2022, komunidade hamutuk na’in rihun 3.230 mak trata dokumentus.
“Rekerente ne’ebé mai trata dokumentus durante fulan rua nia laran ne’e hamutuk rihun 3.230 hahú husi fulan janeiru ba to’o fulan febreiru tinan ne’e, ne’ebé rekerente sira mai trata dokumentus hanesan Sertidaun Nasimentu, Pasaporte no Bileti Identidade (BI) Sertidaun Óbitu,” Diretór António dehan ba www.tempotimor.com Sábadu, (26/03).
Nia haktuir, sidadaun ne’ebé Mai trata dokumentus ne’e maiória estudante.
“Rekerente ne’ebé mai trata dokumentus iha fulan janeiru mak hanesan sertidaun moris nian ne’e mane hamutuk 317 nofeto hamutuk 349, no sertidaun kasamentu tolu ho óbitu ualu no ba bileti identidade 41. Enkuantu husi fulan fevereiru na’in sidadaun mane 438 no feto 375 mak mai trata sertidaun nasimentu hamutuk 813 no Bileti Identidade hamutuk rihun 1.359 no pasporte eletróniku hamutuk 32,” dehan Diretór ne’e.(*)
