Tempotimor (Covalima)-Tersa-feira (26/04/2022) ohin, ekipa Servisu Rejistu Notariadu (SRN) hala’o lansamentu registu online ba sertidaun moris (RDTL) no Billete Identidade (BI) ba komunidade sira iha postu administrativu Tilomar no Fohorem.
Diretor Jerál Servisu Rejistu Notariadu Crissogno da Costa Neto katak, implementasaun programa rejistu online, tanba tuir dadus abitantes milliaun ida resin maka seidauk iha identifikasaun sivíl.
“Ami halo programa ida ne’e tamba ami liu ba dadus sistema demokrátiku ka Management Information System (MIS) katak, sidadaun Timorense hamutuk millaun 1.300-itál mak foin asesu Billete Identidade, signifika barak maka seidauk iha billete indentidade, ida ne’e perigu tebes ba ita-nia estadu, tanba sidadaun Timor-Leste tenke iha indentifikasaun sivíl, afinal ita-nia inan-aman sira iha foho ne’ebá ne’e sira tempu laiha atu tarata dokumentus,’’ hatete DJ Crissogno ba jornalista sira iha Tilomar, Tersa (26/04).
Iha fatin hanesan Sekretáriu Administrasaun Munisípiu Covalima, Francisco Alves apela ba komunidade ne’ebé seidauk trata dokumentus hanesan sertidaun RDTL no BI tenke hakbesik-aan ba Servisu Notariadu munisipál hodi nune’e bele hetan dokumentus importnte hirak ne’e.
“Ita-nia inan-aman sira balun ne’ebé laiha kbi’it no laiha forsa atu ba munísipiu sira bele mai trata sira-nia dokumentus sertidaun moris nian ne’e bele mai iha sede suku Lalawa, ne’ebé kompostu husi suku Lalawa no Beiseuk. tamba ne’e avizu ba komunidade sira liliu ba inan-aman sira ba ferik no katuas sira ne’ebé seidauk iha dokumentus bele hakbesik-aan mai iha sede suku hodi hetan setidaun moris nian,” Nia dehan.
Enkuantu ekipa nasionál hala’o rejistu online iha de’it postu administrativu Tilomar, durante loron lima, no postu Fohorem durante Loron sanulu, enkuantu postu administrativu seluk sei hein etapa tuirmai.(*)
