CCC Sosializa Informasaun Asediu Sexuál no Denge ba Komunidade Covalima

Komunidade sira partisipa hela sosializasaun informasaun ba moras Denge inklui kazu Asediu Sexuál ne'ebé hala'o husi CCC, Kinta (12/05). Foto Tempo Timor

Tempotimor (Covalima)-Liga ba kazu denge ne’ebé kontinua afeta ba komunidade Covalima mak Sentru Komunidade Covalima (CCC) liuhusi programa Feto Rurais halo sosializasaun ba estudante, autoridade lokál inklui grupu feto sira kona-ba prevensaun moras dengue no esploitasaun asedu sexuál hasoru minoridade.

Koordenadora programa Feto Rurais husi CCC, Hilaria Amaral hatete, sosializasaun ne’e kada tinan sempre hala’o hodi habelar informasaun ba komunidade sira kona-ba moras dengue, inklui vasinasaun no esploitasaun ba abuzu sexuál.

Read More

“Atividades ida kada fulan tolu ami sempre konvida oradór sira husi saúde no Alfela para oinsa bele fahe informasaun ba komunidade no joven feto no mane sira, ne’ebé objetivu husi sosializasaun ne’e atu ema adultu sira bele hatene asuntu asedu sexuál no moras denge, tanba asuntu asedu sexuál ne’e ema barak mak seidauk haten, entaun oinsa mak sira bele hatene no asuntu sira ne’e, nune’e karik hasoru bele prosesu no advokásia rasik,” Koordenadora ne’e hatete ba jornalista sira iha Kampu Baru. Kinta (12/05).

Iha fatin hanesan, Xefe suku Maudemo, Maria Fátima agradese ba Sentru Komunidade Covalima tanba fasilita ona informasaun ba komunidade sira.

“Ohin mai halo sosializasaun iha ne’e, oinsa atu prevensaun moras denge no abuzu sexuál, iha ne’ebé oradór mai husi parte saúde no Alfela, entaun ami fila sei fahe informasaun ba ami-nia komunidade sira, nune’e bele hatene nia lala’ok ne’e oinsa,” Nia dehan.

Autoriedade lokál ne’e mós promete, sei servisu hamutuk ho parte hotu, atu nune’e bainhira identifika kazu ruma sei koordena ho parte kompetente hodi bele prosesa tuir dalan legál.

Entretantu sosializasaun ne’e realiza iha salaun Sentru Komunidade Covalima (CCC) durante loron ida no hetan apoiu husi ajénsia IWAD ne’ebé kolabora ho rede referál.(*)

Related posts