Tempotimor (Covalima)-Haree ba Timoroan hira ne’ebé iha kondisaun difisiénsia mak seidauk hetan tulun husi governu no entidade relevantes mak Raes Hadomi Timor Oan (RHTO) husu apoiu ba autoridade lokál sira iha munisípiu Covalima atu identifika.
“Kona-ba preukupasaun ne’ebé ita-nia maluk difisiensia sira hasoru, ami hakarak hatete, ita-nia xefi aldeia sira mak tenki hatene liu ninia povu, tamba ne’e, ami husu apoiu ba xefe aldeia sira karik Ema ho Difisiénsia (EhD) iha, fó hatene ami, nune’e ami bele foti dadus, hodi hetan apoiu ka ajuda ruma,” Koordenadór RHTO, Honorário Gusmão dehan ba www.tempotimor.com iha knaar fatin, Sesta (13/05).
Nia subliña, RHTO sei esforsu hodi buka dalan no fasilita ba EhD iha parte fíziku inklui hirak ne’ebé seidauk iha kartaun eleitorál ka la asesu edukasaun.
“Ami sei buka dalan, maibé la’ós RHTO rasik mak oferese kadeira-roda, maibé RHTO foti informasaun sira ne’e ba halo filafali proposta ba parte relevante Sentro Nasionál ba Reablitasaun Bekora (SNRB) depois ami mós sei tun direitamente hala’o asesmentu depois husu familia karik sira prontu atu hein nia iha fatin ne’ebé maka atu halo kadeira-roda, tamba iha Bekora na’in tenki ba, ne’ebé ema tékniku sira mak bele hatene foin bele halo,” Nia dehan.
Entertantu dadus husi 2019 to’o 2021 totál komunidade EhD iha Covalima hamutuk 304, maibé iha 2022 sediauk identifika. Enkuantu dadus ne’ebé iha ne’e ita apoiu ona hanesan aihan umanitária ba sira maizumenus na’in 93 maka hetan apoiu. Restu RHTO Covalima laiha transporte entaun seidauk distribui sasan to’o iha sai-nia fatin.(*)
