Tempotimor (Covalima)-Ministériu Edukasaun Juventude no Desportu (MEJD) liuhusi Servisu Edukasaun Munisípiu Covalima (SEMC), realiza kompetisaun sertame ba estudante husi Eskola Basika Centrál (EBC) hamutuk Sia iha ámbitu komemorasaun loron Restaurasaun Independénsia ba dala-XX.
Tuir Diretór SEMC, Rui Amaral Suri Seran, matéria ne’ebé estudante sira hetan iha kompetisaun sertame ne’e kona-ba lingua inklui Matemátika.
“Sertame ne’e ba estudante sira husi EBC Salele, EBC Lontale, EBC Sándalo, EBC Suailoro, EBC Ogues, Eskola Kafe, EBC Ladi, EBC Dais, no EBC São Jose Gonsalves. Agora matéria ne’ebé fó ba estudante sira mak lingua Tetum, Portugez, Ingles, no Matemátika. Enkuantu ba eskola sekundária sura partisipa de’it iha Diskursu públiku,” Nia dehan.
Iha fatin hanesan, reprezentante estudante EBC Sentrál Sândalo, Esterlina da Crus sente orgullu iha kompetisaun ne’e, tanba matéria ne’ebe ekipa juri fó, sira aprende ona iha eskola.
“Iha kompetisaun sertame ida ne’e ha’u senti kontenti no orgolhu tebes, tamba bele aumenta tan ami-nia kapasidade no matéria ne’ebé ami hetan ne’e balun difisil no balun la difisil, tanba matéria balun ami hetan ona iha eskola no husu mós ba kolega estudante sira katak, tenki aprende tamba atu hadi’a ita-nia futuru no nasaun,” Estudante ne’e enkoraja Nia maluk sira.
Entretantu kompetisaun sertame ba estudante sira husi EBC Sia ne’e realiza durante loron rua, ne’ebé ohin hahú no estudante sira husi Ensinu Sekundária sei partisipa iha diskursu públiku ne’ebé sei realiza iha loron aban. Alende ne’e orsamentu ne’ebé Komisaun Organizadora aloka ba programa kapasitasau ne’e Liu $900.00 dollar amerikanu.(*).
