Tempotimor (Covalima)-Sekretáriu Estadu Formasaun Professional no Empregu (SEFOPE) liuhusi Diresaun Nasionál Empregu (DNE) apoiu formasaun Mobilidade Laboratoral ba Traballadór hamutuk 22 iha Sentru Treinamentu Claret (STC) Salele, Suku Maudemo, postu administrativu Tilomar.
Tuir formadora Siquita Cardoso, objetivu husi programa ne’e atu tulun traballadór sira hodi fó koñesimentu báziku, oinsa hala’o servisu iha Austrália nomós bainhira fila husi Austrália oinsa bele halo investimentu iha Timor-Leste.
“Programa para atu mobilidade laborál iha objetivu tolu mak hanesan, atu tulun traballadór sira ho di’ak molok ba servisu iha Austrália, ajuda mós traballadór sira oinsa bele ba moris ka servisu iha ne’ebá, inklui atu tulun mós juventude sira servisu iha Austrália fila fali mai halo investimentu iha ita-nia rai,” Formadora ne’e dehan ba jornalista sira iha Sentru Claret, Segunda (23/05).
Alende ne’e, traballadór Jeferino de Fátima Moniz sente orgullu ho formasaun ne’e, tanba bele hasa’e sira nia koñesimentu kona-ba oinsa bele halao servisu iha Austrália.
“Formasaun iha fatin ida ne’e nia benefisiu boot ba ami, ne’ebé sentimentu kontente tebes, tanba liuhusi formasaun hanesan ne’e ami bele prepradu hodi servisu iha Austrália,” Nia afirma.
Enkuantu SEFOPE Liuhusi Diresaun Nasionál Empregu (DNE) realiza ona formasaun Pilotu ne’e, ba dala tolu iha munisípiu Covalima ba kandidatu hamutuk 71.(*)
