Ekipa Front Line 1.102 Simu Ona Vasina AstraZeneca iha Covalima

Ekipa vizilansia Munisipiu Covalima hala'o hela avaliasaun ba implemtasaun vasina AstraZeneca iha salaun Admnistrasaun Munisipal, Sesta (01/05). Foto Tempo Timor

Tempotimor (Covalima)-Liga ba moras Covid-19 ne’ebé afeta ona sidadaun Timor-Leste mak governu liuhusi Ministériu Saúde (MS) halo ona vasina doze primeiru ba ekipa liña frente sira hamutuk rihun 1.102 iha munisípiu Covalima.

Diretór Servisu Saúde Munisípiu Covalima, Filipe Pereira Cardoso hatete, vasina ne’ebé hala’o semana rua iha munisípiu Covalima ba sidaduan sira iha lina frente.

“Horseik ita-nia vasinasaun astrazeneca Covid-19 remata ona no totál pessoál lina frente sira simu hamutuk 1.102, ne’ebé besik ba ita-nia tarjetu, ne’e ha’u agradese tebes tanba kooperasaun servisu ne’ebé di’ak tebes no durante atividade sira ne’e la’o laiha ema ida mak hetan problema ho vasinasaun ne’e,” dehan Filipe ba www.tempotimor.com, sesta (30/04).

Nia akresenta, tarjetu ba ekipa front line iha munisipiu Covalima tuir loloos rihun 1.118 maibé ita alkansa ona rihun 1.102.

“Espera katak tuir mai fali ita-nia autoridade lokál sira halo koordenasaun ho ita-nia Komunidade sira iha munisípiu Covalima bele hetan hotu vasinasaun astrazeneca Covid-19 ne’e,” hateten nia.

Entertantu ekipa front line ne’ebé simu ona vasina iha munisípiu Covalima kompostu husi servisu saúde Polísia Nasionál Timor-Leste (PNTL) munisípiu Covalima no alfandega, Unidade Polísia Fronteira (UPF), Média no Autoridade lokál sira. (*)

Notisia seluk