Tempotimor (Covalima)-Liga ba númeru kazu pozitivu Covid-19 ne’ebé sa’e maka’as iha kapitál Timor-Leste, maka munisípiu Covalima temporáriu blokeia komunidade ne’ebé atu sai husi Covalima mai Dili.
Tuir administradór munisípiu Covalima, Fransisco de Andrade, komesa husi sesta (30/4) la atende ona karta guia de marsa ba sidadaun sira ne’ebé atu viajem ba kapitál Dili.
“Estudante, joventude no komunidade ha’u sei la atende bainhira atu viajen ba kapitál Dili, tanba ha’u simu informasaun husi Dili katak, transmisaun lokál iha kapitál Dili sa’e maka’as, tanba ne’e Covalima labele sai vítima tan moras Covid-19 ne’e, tanba agora ita-nia númeru kazu pozitivu tun ba na’in 19 de’it ona, tanba ne’e mak husi ohin ba oin ha’u sei la atende karta autorizasaun ba estudante no komunidade sira ne’ebé atu viajen ba Dili,” dehan Administradór Francisco ba www.tempotimor.com, Sesta (30/4).
Nia afirma, ema ne’ebé atu viajem ba Dili mak, pesoál saúde, funsionáriu setorais sira iha munisípiu Covalima inklui PNTL no F-FDTL sira.
“Ha’u fó hatene ona ba diretór ospitál referal Suai Covalima, estudante ka komunidade sira atu hasai swap karik husi ohin labele atende ona, só ba pesoál saúde, funsionáriu setorais sira seluk no Forsa F-FDTL no PNTL munisipiu Covalima ne’e bele atende no sira mak bele ba Dili,” hateten nia.
Administradór munisípiu Covalima ne’e akresenta, la autoriza estudante Universitáriu no komunidade sira halo movimentu ba kapitál Dili, tanba kazu iha Dili aumenta inklui númeru kazu iha Covalima mós hela na’in 19 nune’e labele aumenta tan númeru kazu.(*)
