MS Inagura Edifísiu ba Laboratóriu no ICU iha ORS

Ministra Saúde (MS), Odete Belo asina hela plaka ba edifísiu tolu ne'ebé hetan inagurasaun, Kinta (28/04). Foto Tempo Timor

Tempotimor (Covalima)-Ministra de Saúde (MS), Odete Maria Freitas Belo inagura edifísiu henesan sala izolamentu, ICU no Laboratóriu iha Ospitál Referál Suai.

Read More

Iha serimónia solene ne’e, Ministra Saúde Odete Belo katak, fasilidade ne’ebé Ministériu Saúde (MS) harii atu atende komunidade ka pasiente sira bainhira mai halo tratamentu saúde, liliu ba iha pasiente COVID-19 ne’ebé oras ne’e mundu tomak preokupa.

“Ha’u tenta atu ko’alia nafatin ho atividade vasinasaun ligadu ho konstrusaun sira ne’ebé ita halo daudauk tanba saida, kuandu ita-nia vasina la atinje. Imi hakarak konstrusaun furak tebes ne’e ita uza ba pasiente COVID-19 nian? ha’u sente ita lakohi, maibé ita hakarak konstrusaun sira ne’ebé iha ita atu uza ba moras sira hotu,” Hateten Ministra Odete liuhusi diskursu ba inagurasaun edifísiu tolu ne’e iha Ospitál Referal Suai Covalima. Kinta (28/04).

Iha sorin seluk, Diretór Ezekutivu ORS, José Moniz Pereirra, agradese ba oitavu governu konstituisionál liuhusi programa Ministériu Saúde ne’ebé konstrui ona edifísiu tolu iha Ospitál Suai, nune’e bele hafasil atenmentu ba pasiente sira.

“Ohin loron ita hotu partisipa iha fatin ida ne’e hodi halo inagurasaun ba sala ICU, izolamentu no laboratóriu ba COVID-19 iha munisípiu Covalima tan ne’e lori Ospitál Referál nia naran no servisu saúde Munisípiu Covalima hakarak hato’o agradese wa’in ba oitavu governu liliu ba Ministériu Saúde ohin mai halo ona inagurasaun ba uma tolu iha fatin ida ne’e,” Diretór agradese.

Alende ne’e Sekretáriu Munisípiu Covalima, Fransisco Alves, konsidera no agradese ba esforsu ne’ebé oitavu governu halo maske iha situasaun pandemia.

“Ha’u hamriik iha ne’e lori povu Covalima nia naran fó agradese ba oitavu governu konstituisionál liliu ba ita-nia aman Primeiru-Ministru Taur Matan Ruak, ho Ministra Saúde Odete Maria Freitas Belo, iha situasaun ida ne’ebé todan tebes ita hasoru pandemia COVID-19 iha tinan ida ka rua liubá, maibé konsege esforsu maka’as tau obra ida ne’ebé importante tebes ba munísipiu Covalima,” Nia dehan.(*)

Related posts