Tempotimor (Covalima)-Hafoin faze dahuluk ba mereda escolar iha Munisípiu Covalima lakonsege realiza maka iha faze daruak nian, Covalima hetan orsamentu hamutuk dollar rihun $10.626 ba merende eskolár iha faze daruak nian.
Tuir diretór Edukasaun Munisípiu Covalima, Edmundo Ferreira, programa merenda eskolár faze daruak hahú ohin no faze dahuluk la konsege implementa, tanba estadu emerjénsia no serka sanitária iha munisípiu Covalima.
“Iha munisípiu Covalima programa merenda eskolár primeiru períodu ita la konsege hala’o, tanba momentu ne’ebá ita serka sanitária hela, depois númeru Covid-19 mós sa’e maka’as, entaun suspende atividades merenda eskolár la la’o, maibé iha segundu períodu ita halo ona pedidu pagamentu programa merenda eskolár no hahú programa merenda eskolár ne’e rasik iha dia 12 de Abril,” dehan Edmundo ba www.tempotimor.com iha nia knaar fatin Suai, Segunda (3/5).
Diretór ne’e afirma, orsamentu ba programa merenda eskolár iha faze daruak fahe ba pakote rua hanesan Eskola Bázika Sentrál no eskola pre-primária.
Iha fatin hanesan koordenadór eskola bázika central Sândalo We’e Matan Fernado Moniz katak, programa merenda eskolár hahú ona semana kotuk.
“Merenda eskolár komesa ona iha semana kotuk, maibé dezafiu mak alunus balun han rohan de’it, han la hotu tanba alunus balun nia inan aman funsionáriu no empregadu entaun sira la han, entaun entrega fali, tamba iha eskola han la tuir sira-nia favoritu, maibé estudante maiória mak han,” Nia informa.
Nia mós dehan, iha eskola estudante hamutuk 413, ne’ebé fornesedór na’in rua de’it entaun la augenta.
“Iha ne’e ema atu tein ne’e mak problema oitoan, tanba ema na’in rua de’it, ne’ebé alunus sira klase neen ona, entaun ami husu ona atu aumenta tan fornesedór ida, maibé dehan labele tanba ami-nia alunu hamutuk 400 resin de’it,” hateten nia
Iha sitasaun hanesan, reprezentante estudante Angelina da Conceição klasse 6, senti kontenti ho merenda eskolár ne’e, tanba bele apoiu sira durante iha oras eskola nian.
Entertantu eskola EBC We’e Matan Sândalo simu ona orsamntu ba kada semana ho montante arus $516,025 sentavus. Alende ne’e estudante ne’ebé benefisia ba programa merenda eskolár iha munisípiu Covalima ne’ebé kompostu husi EBC 20 ho nia filiál sira no eskola pre-eskolár hamutuk 17 ho total estudante rihun 15.409. (*)
