Tempotimor (Covalima)-Hafoin tama ba tinan 2021 governu Timor-Leste kontinua infrenta hela pandemia Covid-19, maibé parte notariadu munisípiu Covalima mós kontinua halo atendimentu ba sidadaun sira ne’ebé trata dokumentu pesoál nian.
“Durante serka sanitária husi fulan janeiru to’o abril 2021, sidadaun 537 mak trata sira-nia sertidaun mori,s sertidaun kaben no sertidaun mate iha edifísiu notariadu munisípiu Covalima,” dehan diretór servisu notariadu munisípiu Covalima António Sarmento ba www.tempotimor.com iha nia servisu fatin, Segunda(3/5).
Nia mós subliña, ema ne’ebé trata dokumentu iha notariadu, maioria estudante ne’ebé hala’o estudu iha rai laran inklui rai laran.
“Iha tempu serka sanitária estudante universidade mak barak liu trata sira-nia dokumentu sira hanesan Billete Identidade no Sertidaun moris, atu kontinua sira-nia estudu no balu hasai dokumentu sira hodi buka servisu, inan-aman sira menus trata sira-nia dokumentu tanba serka sanitária,” katak Nia.
Fontes ne’e esplika, durante serka sanitária servisu notariadu munisípiu Covalima halo atendementu de’it ba estudante ne’ebé urjente.
“Estudantes trata dokumentus iha tempu serka sanitária nia laran mak sertidaun moris no bom komportamentu,” hateten nia
Entertantu serka sanitária ne’ebé aplika iha Covalima servisu notariadu munisípiu Covalima kontinua halo atendementu ba sidadaun sira ne’ebé trata dokumentu, mais nafatin kumpri regras Organizasaun Mundiál ba Saúde.(*)
