Tempotimor (Covalima)-Liga ba dezastre naturais ne’ebé akontese iha loron 4 fulan abril tinan ne’e, maka organizaun World Vision iha munisípiu Covalima apoiu aihan bázika ba komunidade hamutk uma-ka’in 100 iha postu Zumalai, Tilomar no Maucatar.
Tuir manajér World Vision Joao Moniz katak, haree ba dezastre naturais ne’ebé akontese iha fulan kotuk maka world visiona halo identifikasaun nune’e ohin apoiu neseidade báziku ba komunidade hamutuk uma-ka’in 100 iha Covalima.
“Ami apoiu ba vítima dezastre naturais no inundasaun ne’ebé afeita ba komunidade sira, entaun ami suporta aihan báziku hanesan fos, mina, ikan lata inklu áqua ne’ebé sira presiza iha tempu emerjénsia nia laran,” dehan João ba www.tempotimor.com iha nia knaar fatin, Segunda (10/5).
Nia sublina, world vision apoiu de’it ba komunidade hamutuk uma-ka’in 100 iha postu administrativu Zumalai, Tilomar no Maucatar.
“Primeiru ami halo koordenasaun liuhusi koordenasaun ho xefe suku no administradór postu sira husi fatin tolu ne’e nomós foti dadus liuhusi xefe aldeia sira, depois ami ba halo identifikasaun ba sira ne’ebé grave liu iha inundasaun ne’e mak ami fó apoiu. Hanesa bee tama uma, estraga sira-nia aihan iha to’os laran, entaun komunidade hirak ne’e mak hetan duni apoiu husi world vision,” dehan nia.
Entretantu aldeia komunidade sira ne’ebé hetan apoiu ne’e husi postu Zumalai mai husi suku Tashilin, Mape, Fatuletu, Lour, Zulo, Raimea no Lepo ne’ebé hamutuk uma-ka’in 79, postu Tilomar iha suku Maudemo no Lalawa ne’ebé iha uma-ka’in 16 no postu Maucatar suku Ogues no Holpilat iha uma-ka’in lima.
Entertantu orsamentu hirak ne’ebé world vision uza hodi hola sasan sira ne’e hetan kooperasaun husi Start Fund ho World Vision iha Timor Leste hafoin hola aihan sira ne’e ba komunidade sira.(*)
