Tempotimor (Covalima)-Relasiona loron restaurasaun independénsia Timor-Leste 20 de maiu 2021 ne’ebé hela loron balun atu komemora ba dala XIX mak komisaun organizadora prepara ona, maibé tanba Covid-19 entaun autoriedade munisípiu Covalima sei hein orientasaun husi governu sentrál.
Tuir administradór munisípiu Covalima Francsco de Andrade katak, preparasaun ba komemorasaun 20 de maiu ba dala 19, autoridade Covalima forma ona komisaun organizadora, maibé seidauk iha informasaun formál ruma husi nasionál.
“Kona-ba loron restaurasaun independénsia 20 de maio ne’e husi munisípiu Covalima prepra ona husi komisaun organizadora munisípiu Covalima, maibé ha’u seidauk simu orientasaun husi nasionál sira atu realiza ka lae, liliu Sentru Integradu Jestaun Krize (SIJK) nasionál, ne’ebé ohin ha’u kontaktu ona doutór Rui Maria de Araúju liuhusi via telefone maibé seidauk atende, ne’ebé ita hein de’it, tanba Covalima serka sanitária hela,” dehan Francisco ba www.tempotimor.com, Segunda (10/05).
Nia afirma, orsamentu ba loron komemorasaun tinan 19 restaurasaun independénsia husi nasionál seidauk transferénsia mai munisípiu Covalima.
“Orsamentu atu realiza ba loron proklamasaun 20 de maiu nian ne’e seidauk transfe mai iha munisípiu Covalima, karik orsamentu ne’e tranfere mai entaun ha’u hatene, ne’ebé ita hein de’it husi nivél nasionál,” hateten nia.(*)
