Tempotimor (Covalima)-Tuir Diretór servisu saúde Munisípiu Covalima, Filipe Perreira Lemos katak, virus Covid-19 hahú da’et ona ba guarda prizoneiru Suai hamutuk na’in neen inklui diretór no adjuntu diretór prizaun nian.
“Horseik ekipa saúde ba halo swab teste iha prizaun Suai, ita detekta funsionáriu na’in haat inklui diretór no adjuntu entaun hamutuk na’in neen mak pozitivu ba covid-19, ne’ebé agora kazu komulativu hamutuk 75,” dehan Diretór Filipe ba www.tempotimor.com iha nia knaar fatin Suai, Kuarta (12/5).
Diretór ne’e mós afirma, hafoin detekta kazu foun na’in neen ne’e, pasiente ne’ebé iha izolamentu Bairu Kosta sa’e ba na’in 24.
“Pasiéte ne’ebé sei iha izolamentu hamutuk 24 ne’ebé kompostu husi mane 13 no feto 11 no na’in 51 mak rekupera no fila ona ba uma,” dehan Nia.
Diretór ne’e afirma, hafoin deteta kazu foun iha prizaun Suai ne’ebé kategória klaster foun makal dadaun ne’e pasiente aumenta fali tanba horseik no ohin laiha pasiente ida mak rekopera.(*)
