RCCT Fó Formasaun Jornalizmu Bázika ba Estudante Na’in 10

Estudante sira ne'ebe iha hela aula laran hodi prepara ba formasaun jornalizmu baziku iha RCCT, Covalima. Segunda (7/6). Foto Tempo Timor

Tempotimor (Covalima)-Liga ba servisu hamutuk entre Eskola Sekundaria Jerál Públiku (ESGP) Suai ho Rádio Comunidade Cová Taroman (RCCT), maka ekipa husi RCCT fó formasaun jornalizmu báziku ba estudante na’in sanulu oinsa sai lokusaun ne’ebé di’ak.

Tuir Jestór Radio Cová Taroman, Chamot Nahack katak, treimantu ne’e realiza tanba servisu hamutuk ho ESGP, iha ne’ebé RCCT rasik hanesan parseiru ho Asosiasaun Radio Comunidade Timor-Leste (ARCTL) ne’ebé hetan apoiu husi UNESCO.

Lee Notisia Seluk

“Objetivu husi formasaun ne’e atu promove estudante sira iha área jornalizmu nian liliu iha rádiu-difuzaun no oinsa atu kria rasik programa eskola nian ne’ebé hanaran lian estudante no rádiu sei akompaña nafatin estudante sira durante fulan tolu, atu nune’e bele prodúz programa no notísia atu bele públika ka transmite iha rádiu nomós bele públika liuhusi website eskola nian,” katak Jestór RCCT ba www.tempotimor.com, Segunda (07-06).

Chamot fundamenta, RCCT iha komitmentu atu fahe esperiénsia jornalizmu báziku nomós lokutór (broadcasting) ba estudante sira.

“RCCT nia kbi’it maka atu fahe kapasidade, enkoraza nafatin estudante sira, ne’e mós depende ba mekanismu eskola nian, oinsá! Depois de formasaun ne’e eskola nafatin hakarak kontinua ka lae, maibé ami nafatin enkoraja estudante sira,” nia subliña.

Iha fatin hanesan estudante Lia Hermina sente orguluu tanba bele hetan fiar husi eskola hodi partisipante iha formasaun jornalizmu báziku ne’e.

“Ha’u senti kontenti ho formasaun ida ne’e tanba liuhusi formasaun ne’e ami bele aprende ona iha área jornalizmu nian no ba oin ami mós hakarak tun ba iha terenu hodi halo knaar hanesan jornalista,” dehan estudante Lia.

Iha parte seluk, estudante Joviano José sente kontente, kona-ba formasaun ne’e, tanba bele hola parte iha formasaun jornalizmu ne’e.

“Sente kontenti tebes ho aprezentasaun kona-ba jornalizmu báziku ne’ebé husi Rádiu Komunidade Cová Taroman fahe mai ami, tanba liuhusi aprenzentasaun iha formsaun ne’e ha’u bele kompriende kona-ba servisu jornalista no aban bain-rua ha’u bele sai jornalista ida,” katak nia.

 Entertantu, estudante sira ne’ebé partisipa iha formasaun jornalizmu báziku durante fulan tolu ne’e hamutuk na’in 10 ne’ebé kompostu husi feto na’in lima mane na’in lima.(*)

Notisia seluk