Tempotimor (Covalima)-Hafoin Administrasaun Munisípiu Covalima loke vaga ba funsionáriu kontratadu ho durasaun fulan neen, Covalimaoan hamutuk na’in 351 mak lori dokumentus nadodon ‘hadau malu’ ba konkore, maske vage ne’e presiza ema na’in 15 de’it.
Tuir Jacinto dos Santos, nu’udar prezidente Juri ba selesaun dokumentus katak, vaga ne’ebé husi administrasaun fó sai ba públiku iha 15 de’it, maibé kandidatu sira ne’ebé kompete hamutuk 351.
“Prosesu rekrutamentu ba funsionáriu ne’e avizu ami fó sai iha dia 26 abril 2021 to’o 03 maiu 2021 ami taka, entaun prosesu husi ne’eba mai, ami simu dokumentus depois halo selesaun dokumentus no ohin kontinua hakat ba ezame eskrita,” dehan Jacinto ba www.tempotimor.com iha administrasaun munisípiu Covalima, Kuarta (09/06).
Nia Afirma, husi selesaun dokumentus to’o agora iha kandidatu na’in 200 mak pasa, tanba ne’e sei kontinua ba ezame eskrita.
“Kandidatu selesaun dokumentus hamutu 351, maibé ih selesaun ami hetan kandidatu 200 mak liu, 150 la pasa, nune’e ohin no aban sira na’in 200 bele tuir ona ezame eskrita, entaun ami sei halo selesaun ba kandidatu 200 ne’e, para bainhira pasa ona iha orál maka sei koloka sira ne’ebé pasa tuir área tékniku, injiñeira no ambientál,” Informa Nia.(*)
