SS Fó Impaktu ba Rendimentu Peskadór no Negosiante Ikan

Peskador Adalberto entrega hela ikan ba komprador hafoin sai husi tasi laran, iha tasi ibun Suailoro, Postu Suai. Kuarta (09/06). Foto Tempo Timor

Tempotimor (Covalima)-Peskadór no negosiante ikan iha suku Suailoro, Postu administarivu Suai, Munisípiu Covalima infrenta problema kona-ba rendimentu ikan, tanba Serka Sanitária (SS) ne’ebé governu implementa.

Tuir Peskadór Adalberto Gonçalves katak, serka sanitária ne’ebé governu aplika iha munisípiu Covalima fó impaktu maka’as ba peskadór no negosiante sira, tanba kada loron hetan de’it $5.00 to’o $10.00.

Read More

“Agora moras Covid-19 ne’e halo ami tama tasi laran mós baruk tanba ami nia langanan sira mós ladun telfone ona ami atu sosa ikan, tanba sira dehan simu ikan husi ami ba faan ema la hola hanesan uluk, depois fulan maiu no juñu ne’e ikan laiha nomós laloran boot ona, ne’ebé ami mós tauk atu tama tasi, ne’ebé ami ho bero tama tasi ne’e, ami buka modo meudia no kalan nian deit, ami hetan oituan ami sai ona, tanba ita hetan barak mos ema la hola depois anin mos boot,” dehan peskadór Adalberto ba www.tempotimor.com, Tersa (08/06).

Iha sorin seluk negosiante ikan, Agustino Gonçalves mós triste, tanba situasaun atuál halo ema menus hola ikan no folin tuun tebes.

“Dalaruma hetan ikan barak, maibé ema atu sosa mak araska, ne’ebé dala barak ema la sosa balu ami habai halo maran, ne’ebé osan mak susar, ema servisu sira ne’e sosa, maibe uluk Covid-19 seidauk iha ne’e ema baibain mós sosa, ne’ebé ami fila ba uma ne’e motor mamuk hela de’it, maibé agora ita lori tama sai bairo mós ema susar loos hola ikan talin ida,” katak Nia.

Nia afirma, ikan sira ne’e sosa tutan husi peskadór sira ho folin dollar $1.00, entaun faan ba dollar $2.00, maibé ema la hola, entaun tenke hatún folin ba dollar $1.50 sentavus.

“Ami reza ba Aman Maromak iha tempu badak moras Covid-19 ne’e hotu ona, tanba ami terus liu ona, tanba ami-nia servisu mak faan ikan ne’e ona hodi sustenta ami nia Família,,” nia tenik.(*)

Related posts