Tempotimor (Covalima)-Ministériu Asuntu Parlamentár no Komunikasaun Sosiál (MAPKomS) hahú loke liras formasaun nian ba munisípiu liuhusi Diresaun Nasionál Diseminasaun Informasaun (DNDI).
Iha formasaun ne’e, xefe ekipa MAPKomS, Pinto Alves Gonzaga katak, formasaun ba juventude sira iha suku Dato-tolu, postu administrativu Fohorem ne’e ko’alia kona-bá ezekusaun fundu transferénsia, jestaun sentru informasaun no sityzen jornalizmu.
Fontes ne’e akresenta, fó formasaun ba joven sira iha área rurál ne’e importante tebes, nune’e munisípiu seluk bele hatene área pontesialidade iha suku ida ne’e.
“Ha’u hanoin ida ne’e formasaun báziku ba joven sira, nune’e sira bele uza ekipamentu ne’ebé ami fahe tiha ona ba joven sira iha tinan kotuk,” katak Phinto ba jornalista sira iha Suku Dato-tolu, Kuarta (23/06).
Ekipamentu ne’ebé MAPKomS apoiu uluk ona ba joven sira iha Dato-tolu mak hanesan Kámera, Laptop inklui Komputadór hodi fasilita ba joven sira, nune’e iha suku laran mak iha atividade ruma, juventude sira bele halo kobertura, depois servius hamutuk ho jornalista balun.
Iha fatin hanesan xefe suku Dato-tolu, João Agustinho Resi agradese ba programa refere, tanba benefísiu ba joven sira.
“Ha’u sente kontente ho programa ida ne’e, nune’e suku izoladu labele sai ona suku izoladu, tanba joven sira belé halo kobertura ba iha nível munisípiu bele to’o ona iha nasionál,” kata xefe suku ne’e.
Entertantu juventude sira ne’ebé tuir formasaun ne’e hamutuk na’in 20, ne’ebé kompostu husi mane na’in 12 no feto ualu.(*)
