Tempotimor (Covalima)-Liga ba orsamentu rihun $45.000 ne’ebé Sekretáriu Estadu Juventude no Desportu (SEJD) apoiu ba grupu juventude empreendedorizmu sira iha nível suku no postu, munisípiu Covalima nian, mak Centro Juventude Covalima (CJC) forma ona ekipa hodi halo selesaun ba proposta 45 ne’ebé tuir terjeitu sei tama iha Centro Juventude Covalima.
Tuir jenerál manajer Konsellu Juventude Munisípiu Covalima, Calistro L. Gusmão katak, husi parte CJC forma ona ekipa hodi halo selesaun ba proposta hirak ne’ebé grupu emprendedorizmu sira iha Covalima.
“Objetivu enkontru ohin loron ne’e establese ekipa avaliasaun proposta ba programa ida ne’ebé hanaran Programa Estimulu Empreendedorizmu Sosiál Joventude Suku (PEESJS) ninian,” katak jenerál manajer ne’e ba www.tempotimor.com iha nia knaar fatin, Segunda (12/07).
Nia afirma, molok ne’e ekipa sira husi CJC lori avizu no panfleitu sira ba tak iha nivel suku no postu liga ba programa apoiu grupu empreendedorizmu sosiál ne’e.
“Ba dahuluk ekipa sentru juventude taka avizu iha nivel suku no postu administrativu hitu iha munisípiu Covalima, ne’ebé ba komunidade no grupu sira ne’ebé iha intrese hodi hatama proposta ne’e ba área tolu mak hanesan agrikultura, pekuaria no peskas inklui turizmu ambientál. Ne’ebé dadaun ne’e proposta tolu tama ona iha SJC, restu seidauk, tanba tarjetu ba proposta ne’e hamutuk 45, ne’ebé komesa ohin balu hatama ona,” haktenik nia.
Entertantu enkontru ne’ebé ekipa hala’o hodi forma ekipa ne’e hala’o iha salaun Sentru Juventude Covalima, no estrutura avaliasaun mai husi reprezentante administradór Munisípiu inklui reprezentante sosiedade sivil na’in ida, Parlamentu Foinsa’e na’in rua, Ministériu Agrikultura no Peskas na’in ida. Inklui orsamentu ne’ebé SEJD atu apoiu ba grupu empreendedorizmu ne’e hamutuk rihun $45.000 dollar Amerikanu.(*)
