Tempotimor (Covalima)-Tuir xefe Postu Saúde Fohorem, Aleixo Ferreira Carvalho, eletrisidade iha postu Fohrem mate-lakan loron ida bele mate dala ruak ka dala tolu, entaun asmeasa ba aimorus vasina AstraZeneca ne’ebé iha postu ne’e.
“Ahi mate-lakan hanesan ne’e hodi amesa mós aimoruk AstraZeneca ne’e, tamba aimoruk ne’e presiza ahi lakan 24 oras, Se ahi mate lakan maka aimoruk ne’e aat hotu halo nusa? se mak atu responsabliza!, ne’ebé fó hanoin ba autoridade munisípiu tenke haree nomós Parte EDTL munisípiu nian tenke toma atensaun,” dehan xefe postu Saúde Aleixo ba www.tempotimor.com iha nia knaar fatin, Ohin (10/07).
Iha fatin hanesan, xefe suku Fohorem, Fernando Ferreira mós dehan, ahi mate-lakn la’ós ameasa ba aimoruk de’it, maibé estraga mós sasan ektrónika komunidade sira nian.
“Ami-nia ahi ne’e kuandu mate bele to’o loron rua ka tolu, hodi estraga komunidade sira-nia jelera no televisaun. Ne’ebé ami husu ba EDTL munisípiu tenke servisu ho di’ak, nune’e labele estraga sasan ne’ebé liga ho ahi. Tamba bebeik ona ahi mate hanesan ne’e, ami kontaktu ba EDTL munisipál, maibé parte EDTL hatán mak sei hadi’a, entaun se nune’e ahi kontinua mate-lakan,” katak nia.
Iha fatin seluk, reprezentante komunidade Fohorem, Maria de Jesus sente triste ho servisu EDTL, tanba ahi mate-lakan hela de’it, entaun estraga sasan sira ne’ebé liha ba eletrisidade.
“Ahi ne’e lor-loron mate-lakan hela de’it, dalaruma mate loron tomak, bele mate to’o loron rua ka tolu, entaun ami ne’ebé halo negósiu ki’ik sira ne’e, estraga hotu ami-nia sasan iha kios laran hanesan jelera no makina tunu paun nian,” dehan komunidade.
Liga ba preokupasaun komunidade no autoridade lokál nian ne’e, www.tempotimor.com koko konfirma ho diretór EDTL postu Fohorem, maibé laiha fatin.(*)
