Tempotimor (Covalima)-Konsellu Veteranus Munisípiu Covalima (KVMC) hahú halo verifikasaun ba dadus veteranus 302 iha suku Lactos, postu administrativu Fohorem ne’ebé rejista iha tinan 2009.
Xefe ekipa verifikasaun dadus ba tinan 2009, Francisco Doutel Sarmento “La Mesak” katak, munisípiu Covalima dadus ne’ebé rejista ona hamutuk liu rihun 9.600.
“Dadus iha Covalima liu rihun 9.600 maibé molok ne’e ita verifika uluk ona hamutuk 500 iha suku Dato-Tolu, ne’ebé remata ona horseik,” dehan xefe ekipa verifikasaun ne’e, iha Suai, Tersa (10/08).
Nia afirma, rezultadu verifikasaun ba dadus ne’e sei fó sai ba públiku liuhusi Ministériu Asuntu Kombatentes Libertasaun Nasionál (MAKLN).
“Ami mai ne’e foti sira-nia deklarasaun, atu aprova ka lae ne’e iha baze legál husi nasionál iha Ministériu Asuntu Kombatentes Libertasaun Nasionál mak foin bele haree iha ne’ebá, depois mós ami sei tuur hamutuk hodi halo avaliasaun kona-ba hira maka aprova no hira maka la aprova, depois hira maka kategória 0/3, 4/7 no 8/14,” nia esplika.
Iha fatin ne’e Representante Falintil Regiaun IV Asistente Polítika Militar Atuál Prezidente Konsellu Veteranus Munisípiu Ainaru, Julio da Conseição “Loro Mesak” husu ba inan-aman sira atu labele ta’uk no moe, hodi konta kona-ba kontribuisaun ba luta libertasaun nasionál.
“Ha’u-nia inan-aman sira, labele ta’uk no moe atu ko’alia, saida maka imi halo durante tempu Indonézia nian, kuandu imi tauk imi maka lakon, ami atu defende ita-boot sira nia ema, hodi haree ida ne’ebé maka halo dehan halo, ida ne’ebe maka lae dehan lae, keta halo ba uluk balu tiru hasoru fali ami mós dehan beteranu fali, ida ne’e ha’u la simu, maibé ema ida ho nia istória rasik,” dehan Loro Mesak.
Alende ne’e sekretáriu NUREP Jose Morais de Jesus “Vida at Restu” konsidera dadus 302 iha suku Lactos maioria inklina aan iha rede Klandestina.
“Iha suku ne’e rasik kandidatu atu halo verifikasaun hamutuk 302, maibé depende ba sira-nia ko’alia de’it, karik nia dedikasaun ne’e maka’as entaun nia bele 8/14, maibé ha’u konsidera katak maioria inklina hotu iha rede Klandestina,” nia dehan.
Entertantu verifikasaun ba dadus sira iha suku Lactos ne’e durante sei hala’o durante semana ida, maibé molok ne’e ekipa verifikasaun kari uluk aifunan iha monumentu Masakre Rai-Ulu 12 de Setembro 1999 inklui halo mós juramentu ba Bandeira Nasionál no Bandeira Falintíl.(*)
