Tempotimor (Covalima)-Tuir xefe ekipa verifikasaun ba dadus veteranu iha suku Lactos, Francisco Doutel Sarmento “La Mesak” katak, juventude ne’ebé antes ne’e sei idade kiik maibé partisipa ona luta ba libertasaun nasionál, sei hetan sertifikadu husi estadu.
“Kona-ba joven sira ne’ebé maka luta ba ukun rasik-aan iha tempu ne’ebá ho idade menor, ida ne’e ita haree mós husi nia partisipasaun, maibé tamba sira tinan sei ki’ik ita konsidera fo sertifikadu, atu nune’e nia jerasaun ba jerasaun ka nia oan sira bele lori nia sertifikadu ne’e hodi hatudu katak uluk ha’u-nia aman mós luta ba rai ida ne’e,” dehan Francisco ba jornalista sira iha Lactos, Tersa (10/08).
Iha fatin hanesan Konsellu Kombatentes Libertasaun Nasionál Munisípiu Covalima, atuál sekretáriu da Zona Fitun Nabilan, Ozorio Soares “Mau-Soko” katak, iha ona planu atu halo levantamentu dadus ba ema ne’ebé mate ka abortus iha funu laran.
“Foin dadauk Maun Loro Mesa ami na’in rua ba Dili, ha’u rona informasaun levantamentu dadus uma lisan atu la’o dadaun ona, ne’ebé ema ne’ebé maka abortus iha funu laran, mate ba kolera, maibé ema ne’ebé maka ho iha naran zintiu hanesan (Bere, Mali, soi, no seluk tan) ne’e tau hotu depois sei identifika mós abrigu 1975 nian,” katak Nia.
Alende ne’e Julio da Conceição “Loro Mesak” mós dehan, atu halo verifikasaun ba dadus veteranu nian la haree ba partidu, maibé konta istória luta ema ida-idak nian.
“Verifika dadus ne’e la haree ba partidu, balu dehan o tuir ha’u-nia partidu ha’u fo 8/14, ida ne’e polítika beik-ten, ami sei hare ema ne’ebe maka uluk servisu duni ba rai ida ne’e maka merese atu fó nia direitu, la’ós haree husi kor partidu fali,” Nia tenik.
Nia reforsa, labele haketak malu, veteranus tenke hamutuk, ita ne’e tenke ida de’it hanesan iha tempu uluk, labele lori partidu haketak fali ita, ne’e labele,” Haktenik Loro mesak(*)
