Tempotimor (Ainaro)-Atu prepara juventude Timor-leste ba lideransa iha futuru, mak Plan Internasionál iha Timor-Leste ho parseria Fundasaun Nafofila oferese ona uma seguru ba juventude munisípiu Ainaro.
Tuir Project Manager Plan Internasionál, Eta Mota katak, Plan Internasionál hamutuk ho parseira Fundasaun Nafofila establese uma seguru ba joventude sira ho objetivu atu juventude sira bele hetan formasaun hodi hetan tratamentu iha uma seguru ida ne’e.
“Ita hotu hatene katak, Plan Internasioan servisu hamutuk ho parseria Nafofila atu bele establese uma seguru, ho objetivu mak juventude sira bele hetan formasaun nomós tratamentu saúde iha fatin ida ne’e,” hateten Manager Project ne’e ba jornalista sira, Tersa (17/08).
Iha fatin hanesan administradór munisípiu Ainaru, Leovigildo Amaral Perreira agradese ba Plan Internasionál ho parseiru fundasaun Nafofila ne’ebe establese ona uma seguru ba juventude sira iha Munisípiu Ainaru.
“Ha’u agradese tebes ba Plan Internasionál ho parseria Fundasaun Nafofila ne’ebe establese ona uma seguru ba joven sira iha ne’e, hodi nune’e joven sira bele aprende no halo tratamentu saúde iha fatin ne’e,” nia tenik.
Entretantu iha serimónia entrega uma seguru ne’e ba autoriedade munisípiu Ainaro nian, uma refere hetan kedas inagurasaun husi Plan Internasionál, ne’ebé partisipa husi Administradór Munisípiu Ainaro, Komandante PNTL munisípiu Ainaru, autoriedade lokál sira, inklui povu Ainaro no partisipante seluk tan.(*)
