Tempotimor (Ainaro)-Tersa-feira (17/08/2021) horseik, Ministru Agrikultura no Peskas (MAP), Pedro dos Reis hamutuk ho ekipa kolleta Fehuk-ropa hektares ida iha Postu Administrativu Hatu-Builiku Munisipiu Ainaro.
Hafoin kolleta ba produtu lokál ne’e, Ministru Pedro agreade ba grupu to’os na’in sira iha Hatu-Builiku ne’ebé iha situsaun Covid-19 bele kuda Fehuk-ropa nne’ebé ohin kollate ona.
“Agradese ba ita-nia inan-aman sira iha tempu difisil ne’e bele kuda no ohin kolleta ona Fehuk-ropa hektares ida, maske situsaun difisil, maibé husu inan-aman sira kontinua nafatin hakbesik-aan ida-idak nia toos nune’e labele hamlaha, tanba moras Covid-19 ida ne’e sai lisaun ida ba ita hotu,” dehan Ministru MAP ba média sira iha Hatu-Builiku, Tersa (17/08).
Governante ne’e dehan, governu iha ona planu atu sosa aihan sira ne’ebé produz husi inan-aman ka grupu to’os na’in sira iha munisípiu.
“Ita lalika hela ho duvida, ita nafatin halo koordenasaun di’ak, oinsá ita bele halo explora, tanba ita-nia rai la’ós ba fehuk de’it ba buat hotu, tanba rai bokur, kestaun merkadu ne’e buat ketak ida, klaru ita-nia merkadu sufsiente ona, maka governu nia planu atu sosa,” dehan Pedro.
Entertanru iha aktividades kolleta Fehuk-ropa ne’e, marka presensa mós husi autoridade lokál no liña sektorais sira tomak iha munisipiu Ainaru.(*)
