Tempotimor (Kovalima)-Povu Fatululik ho haksolok no dahur hodi komemora loron Proklamasaun Independénsia Timor-Leste ba dala-46 ne’ebé monu iha loron 28 novembru.
Iha selebrasaun loron importante ne’e www.tempotimor.com mós observa katak, povu FatuLulik hala’o misa agradesimentu ba loron Proklamasaun Indenpendénsia depois kontinua kedas issar Bandeira Nasional.
Reprezentante komunidade Fatululik Cesar do Carmo sente kontenti ho loron komemorasaun loron proklamasaun indenpendénsia ne’e tanba povu livre.
“Ami hanesan komunidade sente orgullu tebes ho loron proklamasaun indenpendénsia ba dala-46 ne’e. Tanba loron ida ne’e marka historia ba Timor-Leste ne’ebé halo ami haksolok iha fatin ida ne’e nomós iha fatin seluk,” katak Cesar ba www.tempotimor.com, Domingu (28/11).
Iha sorin seluk xefe aldeia nu’udar mós liana’in suku Taroman, João da Cruz fó parabéns ba povu Fatululik ne’ebé selebra loron Proklamasaun Independénsia ba dala-46 ho kontente.
“Hato’o parabéns no selebra loron proklamasaun da indenpendensia ida ne’e, ami ho povu dala ida tan hato’o parabéns loron murak ne’e,” hateten nia
Enkuantu selebrasaun Proklamasaun Independénsia Timor-Leste ba dala-46 iha postu FatuLulik ho tema “União e a Luta Conjunta Para a Vitória de todus”.
Entretantu postu administrativu Fatululik kompostu husi suku Taroman ne’ebé iha aldeia lima no suku FatuLulik iha aldeia tolu, ne’ebé ho totál populasaun rihun 3.075.(*)
