Tempotimor (Kovalima)-Ofisiál Polísia Nasionál Timor-Leste (PNTL) ho Falintíl Forsa Defeza Timor-Leste (F-FDTL) hamutuk 19 ne’ebé kompostu husi na’in 12 iha kursu Estadu Maiór Konjunta no Integradu (CEMCI) no na’in 7 husi kursu Pos-Graduasaun Estudu Estratéjiku e Reziliénsia Nasionál (PGEERN) ne’ebe sei hala’o estájiu durante fulan tolu iha Covalima hodi kompleta estudu iha Institutu Defeza Nasionál (IDN).
Tuir Diretór Asuntu Akadémiku IDN, Guilherme Soares katak,, estudante hirak ne’e sei aprezenta traballu ida liuhusi unidade kurikulár ne’ebe antes ne’e sira hetan bainhira remata estájiu durante fulan tolu iha Kovalima.
“Tinan ne’e ami iha formasaun rua, ida maka Kursu Estadu Maiór Konjuntu Integradu (CEMCI), ne’ebe partisipa husi PNTL ho F-FDTL durante fulan hitu, ida tan maka Kursu Pos-Graduasaun Estudu Estratéjiku e Resiliênsia Nasionál (PGEERN) durante fulan tolu, ne’ebe husi Kursu rua ne’e últimu sira nia traballu finál ne’e alunus sira tenke dezenvolve traballu investigasaun individuál ida, depois sira tenke aprezenta traballu ida liuhusi unidade kurikulàr ne’ebé sira hetan ona,” dehan Guilerme bainhira hasoru malu ho Administradór Munisípiu Covalima (AMC), Francisco de Andrade iha salaun administrasaun, Kinta (25/11).
Iha fatin hanesan Koordenadór kursu IDN, Tenente Koronel Beneditos Dias Quintas “Punu Fanu” hateten, estudante hirak ne’e sei halibur mós dadus kona-ba sosio-ekonómika, kulturál inklui kona-ba administrasaun nian.
“Agradese tanba administradór munisípiu simu ami ho di’ak, depois bele fó informasaun kona-ba situasaun sosio-ekonómia, sosio-kultural, kona-ba administrasaun nian, oinsa administra área Suai ninian, oinsa ekonómia iha ne’e, para ami-nia estudante sira bele iha koñesimentu kona-ba ida ne’e,” katak Punu Fanu.
Entretantu administradór munisípiu Kovalima, Francisco de Andrade agradese ba ekipa estajiádu sira-nia prezensa iha Kovalima, tanba primeira vez Kovalima simu forsa konjunta atu hala’o estájiu iha ne’e.
“Ha’u agradese ba ita-boot sira i bemvindo, tanba pela primeira vez ami hasoru forsa konjunta mai atu halo servisu ka estájiu iha Kovalima, ne’ebé imi-nia servisu ne’e importante duni, tanba durante ne’e seidauk akontese iha ne’e, ne’ebé bainhira tun ba terenu karik tenke koordena didi’ak ho autoridade lokál sira atu nune’e bele susessu,” katak Francisco.
Entretantu durante atividade kursu rua ne’e la’o, IDN hala’o kooperasaun hamutuk ho Universidade Lisboa Portugal no Universidade Nasionál Timor Lorosa’e (UNTL) hodi fasilita dosente sira hodi hanorin.(*)
